რუსეთსა და უკრაინას შორის მოლაპარაკებაზე რუსული მხარე აღარ არის წინააღმდეგი, რეფერენდუმი ჩატარდეს ქვეყნის ნეიტრალიტეტის და სხვა საკითხების შესახებ, გარდა ყირიმის საკითხისა, ანუ სტამბოლის მოლაპარაკებებზე უკრაინის შეთავაზებულ სამშვიდობო შეთანხმებაზე რუსეთმა ზეპირი თანხმობა განაცხადა, გამონაკლისი მხოლოდ ყირიმის საკითხია, - ამის შესახებ რუსეთთან მოლაპარაკებებში უკრაინის დელეგაციის ხელმძღვანელის, მმართველი პარტიის, „სლუგა ნაროდას“ საპარლამენტო ფრაქციის თავმჯდომარის,  დავით არახამიას კომენტარს უკრაინული გამოცემა UNIAN-ი ავრცელებს.

არახამიას ინფორმაციით, რუსეთის მხარემ ამის შესახებ სიტყვიერად განაცხადა 1 აპრილს გამართულ ონლაინ შეხვედრაზე. წერილობითი, ოფიციალური განცხადება ამ თემაზე არ მოიპოვება.

მისივე თქმით, სამშვიდობო შეთანხმების პროექტები უკვე იმ ეტაპზეა, რომ ორივე ქვეყნის პრეზიდენტებს შეუძლიათ პირისპირ შეხვედრისას მათი განხილვა. არახამიას ვარაუდით, ეს შეხვედრა სტამბოლში გაიმართება, მაგრამ თარიღი და ადგილი ჯერ არ არის განსაზღვრული.

მისივე თქმით, ახლა ჯგუფების ამოცანაა არა თავად დოკუმენტის, არამედ იმ საკითხების საბოლოო ეტაპის შემუშავება, რომლებსაც დიპლომატები უკვე შეეხნენ. ასევე, მოსამზადებელია პრეზიდენტების შესაძლო შეხვედრა. რაც შეეხება უკრაინის უსაფრთხოების გარანტიებს, ამასთან დაკავშირებით აქტიური კონსულტაციები მიმდინარეობს - ნატო-ს სამი ქვეყანა უკვე შეთანხმდა გარანტიების გაცემაზე ზუსტად იმ ფორმატით, რაც უკრაინის მიერ არის შემოთავაზებული. ესენი: თურქეთი, გერმანია და იტალია. არახამიას თქმით, უკრაინისთვის მნიშვნელოვანია, რომ ბირთვული შეიარაღების მქონე ქვეყნებმა გასცენ გარანტიები. რუსეთთან მოლაპარაკებებში უკრაინული დელეგაციის ხელმძღვანელმა ასევე აღნიშნა, რომ უკრაინა ჩინეთთან მოლაპარაკებებს დიპლომატიური არხებით აწარმოებს. როგორც მან დასძინა, ჩინეთი ნაკლებად არის მზად, მაგრამ ოფიციალური კიევი მაინც ელის, რომ ეს ქვეყანა მაინც შევა გარანტორი ქვეყნების სიაში.

უკრაინის დელეგაციის ხელმძღვანელმა ასევე თქვა, რომ თუ უკრაინელები მხარს არ დაუჭერენ ნეიტრალიტეტის საკითხს, ანუ, მიემხრობიან ნატოში გაწევრიანებას, შესაძლებელი იქნება ან ახალი მოლაპარაკება, ან განახლდება საომარი მოქმედება.

რუსეთის მხარეს უკრაინის წარმომადგენლის სიტყვების შესახებ კომენტარი არ გაუკეთებია. უკრაინის დელეგაციის წინადადებაში, რომელიც წარადგინეს ამას წინათ სტამბულში გამართულ მოლაპარაკებაზე, კერძოდ ნათქვამია, რომ უკრაინა მზად არის ნეიტრალური სტატუსისთვის და სხვა ქვეყნებთან სამხედრო თანამშრომლობაზე უარის თქმისთვის უსაფრთხოების ცხადი გარანტიების სანაცვლოდ. ამის შესახებ უნდა გაიმართოს რეფერენდუმი, რომელიც მხოლოდ უკრაინიდან რუსეთის არმიის სრული გასვლის შემდეგ იქნება შესაძლებელი. ამასთან, რუსეთს სთავაზობენ, „გაყინონ“, რუსეთის მიერ ანექსირებული ყირიმის სტატუსი 15 წლით და ამ დროის განმავლობაში გაგრძელდეს მოლაპარაკება.

წინადადებებში არაფერია ნათქვამი ე.წ. დენაციფიკაციასა და დემილიტარიზაციაზე, ასევე დონბასის სტატუსზე. ეს თემები რუსეთის პრეზიდენტმა მიმდინარე „სპეცოპერაციის“ მიზნად დაასახელა.

კრემლის პრესმდივანმა, დმიტრი პესკოვმა რუსეთის ტელევიზიის ეთერში, კვირას, განაცხადა, რომ მოსკოვი იმედოვნებს, სპეცოპერაციის შედეგად უკრაინაში აიკრძალება „ნაციონალისტური იდეების გამოვლენა“, ხოლო რუსული ენა თავის პოზიციას აღიდგენს. მოლაპარაკების პროექტზე, რომელსაც განიხილავენ შეხვედრებისას ამაზე არაფერია ნათქვამი. როდის გაიმართება მოლაპარაკების შემდეგი რაუნდი, არაა ცნობილი. მოლაპარაკება მიმდინარეობს საომარი მოქმედების ფონზე. ბოლო რაუნდის შემდეგ რუსეთის ჯარმა კიევის ოლქიდან უკან დაიხია.