რუსეთის სოფლის მეურნეობის სამინისტროს ცნობით, დღეიდან 22 თებერვლიდან რუსეთი საექსპორტო ბაჟს 11%-ით ზრდის და 1 ტონაზე 4653,5-ის ნაცვლად 5177,2 რუბლს აწესებს.

ქერზე არსებული ბაჟი 3209,1 რუბლიდან 3717 რუბლამდე, ხოლო სიმინდზე მოქმედი ბაჟი კი 1670 რუბლიდან 2199 რუბლამდე იზრდება. ახალი ტარიფები 28 თებერვლის ჩათვლით იმოქმედებს.

საექსპორტო გადასახადი საქონლის საინდიკაციო ფასებიდან დგება, რაც ერთ ტონა ხორბალზე 304.8 დოლარს (ნაცვლად არსებული 306.2 დოლარისა), ქერზე 261.1 დოლარს (261.1 დოლარი), ხოლო სიმინდზე 231.6 დოლარს (230 დოლარი) შეადგენს.

2021 წლის 2 ივნისს რუსეთის  ფედერაციამ მარცვლეულზე საექსპორტო ბაჟი აამოქმედა რომელიც ხორბლის, სიმინდისა და ქერის ექსპორტზე და მათგან მიღებული სახსრების დაბრუნებას სოფლის მეურნეობის მწარმოებლების სუბსიდირებისთვის მცურავ გადასახადებს ითვალისწინებს. გადასახადების ოდენობა გამოითვლება ყოველკვირეულად ფასების ინდიკატორების საფუძველზე მოსკოვის ბირჟაზე რეგისტრირებული საექსპორტო კონტრაქტების ფასების საფუძველზე.

შეგახსენებთ, რომ საქართველოსთვის ხორბლის მთავარი საიმპორტო ბაზარი რუსეთია. 2022 წლის მონაცემებით, ამ ბაზარზე დამოკიდებულება 95.1% იყო. გასულ წელს ქვეყანაში ხორბლის იმპორტი შემცირდა. ოფიციალური სტატისტიკით, იმპორტირებული ხორბლის ღირებულება 2021 წელთან შედარებით, 30.6%-ით, ხოლო მოცულობა 49.8%-ით ნაკლებია. შესაბამისად, გასულ წელს 184 063 ტონა ხორბლის შესაძენად საქართველოდან 65.7 მლნ დოლარი გავიდა.