რუსეთმა გაეროს მსოფლიო ტურიზმის ორგანიზაციას მოუწოდა, უარი თქვას ტურიზმის პოლიტიზებაზე და უკრაინაში ომის დაწყების გამო რუსეთი ორგანიზაციიდან არ გარიცხოს. სააგენტო „ტასს“-ის ინფორმაციით, ამ შინაარსის წერილით საერთაშორისო ორგანიზაციის აღმასრულებელ საბჭოს მიმართა რუსეთის ფედერალური უწყების, „როსტურიზმ“-ის ხელმძღვანელმა, ზარინა დოგუზოვამ.
დღეს, 8 მარტს მადრიდში დაგეგმილია გაეროს მსოფლიო ტურიზმის ორგანიზაციის აღმასრულებელი საბჭოს საგანგებო სხდომა, რომელმაც უნდა გადაწყვიტოს რუსეთისთვის წევრობის შეჩერების განსახილველად გენერალური ასამბლეის მოწვევის საკითხი. დოგუზოვა ითხოვს, რომ გენერალური ასამბლეის მოწვევასა და რუსეთისთვის წევრობის შეჩერებაზე უარი თქვან, რადგან „ტურიზმი მოწოდებულია ადამიანების გაერთიანებისა და ქვეყნებს შორის მეგობრული კავშირების განმტკიცებისთვის და პოლიტიზებისგან თავისუფალი უნდა იყოს“.
დოგუზოვა აცხადებს, რომ ტერიტორიული მთლიანობის და სუვერენიტეტის საკითხები არ არის გაეროს მსოფლიო ტურიზმის ორგანიზაციის კომპეტენცია.
უკრაინაზე რუსეთის თავდასხმიდან რამდენიმე დღეში, 27 თებერვალს, გაეროს მსოფლიო ტურიზმის ორგანიზაციის გენერალურმა მდივანმა, ზურაბ პოლოლიკაშვილმა წევრ ქვეყნებს მოუწოდა, განიხილონ რუსეთისთვის წევრობის შეჩერების საკითხი.
მსოფლიო ტურიზმის ორგანიზაცია
