მოსკოვის ელჩმა მსოფლიო მემკვიდრეობის ძეგლების სიაზე პასუხისმგებელი ჯგუფის თავმჯდომარის პოსტი დატოვა.
მსოფლიო მემკვიდრეობის კომიტეტი, რომელიც პასუხისმგებელია იუნესკოს მსოფლიო მემკვიდრეობის ძეგლების სიაში ახალი ძეგლების დამატებაზე, თვეების განმავლობაში ვერ ფუნქციონირებდა. ამის მიზეზი რუსეთის მიერ უკრაინაში შეჭრა იყო.
„მე მაქვს პატივი გაცნობოთ რომ ჩემი, როგორც რუსეთის ფედერაციის მუდმივი დელეგატის იუნესკოში მისია დასრულებულია“ - ნათქვამია იუნესკოში უკვე ყოფილი რუსეთის ელჩის ალექსანდრე კუზნეცოვის წერილში.
„იუნესკოში რუსეთის ელჩის გადადგომა დაასრულებს ჩიხს იმ საკვანძო ჯგუფში, რომელსაც ის ხელმძღვანელობდა და რომელსაც მთელს მსოფლიოში კულტურული ძეგლების შენარჩუნება ევალება“, წერს The Guardian-ი
თებერვალში მოსკოვის უკრაინაში შეჭრის შემდეგ, რუსეთის კომიტეტის თავმჯდომარის პოსტზე ყოფნამ, დელეგატების პროტესტი გამოიწვია.
კომიტეტის შეკრება ივნისში, რუსეთის ქალაქ ყაზანში იყო დაგეგმილი, მაგრამ 46-მა ქვეყანამ, მათ შორის საფრანგეთმა და დიდმა ბრიტანეთმა, ღონისძიებას ბოიკოტი გამოუცხადა.
იუნესკოს რეგულაციების თანახმად, გადამდგარი კომიტეტის თავმჯდომარის შემცვლელი იმ ქვეყნიდან უნდა დაინიშნოს, რომელიც ინგლისურ ენაზე ანბანური თანმიმდევრობით გადამდგარი წევრის შემდეგაა.
ამ რეგულაციის თანახმად, საუდის არაბეთი უახლოეს დღეებში გამოაცხადებს, დაიკავებს თუ არა კომიტეტის თავმჯდომარის პოსტს.
რუსეთის იუნესკოს მსოფლიო მემკვიდრეობის კომიტეტიდან გარიცხვას ტელეგრამში გამოეხმაურა უკრაინის კულტურისა და საინფორმაციო პოლიტიკის მინისტრი ალექსანდრე ტკაჩენკო.
„რუსეთი აღარ არის იუნესკოს მსოფლიო მემკვიდრეობის კომიტეტის თავმჯდომარე. ტერორისტებს ადგილი არ აქვთ საერთაშორისო ორგანიზაციებში, რომლებიც მშვიდობის შესანარჩუნებლადაა შექმნილი. ტერორისტებს ჩვენი მიწიდანაც განვდევნით. მადლობა საგარეო საქმეთა სამინისტროს და ICIP-ს შრომისმოყვარეობისთვის“, - წერს ტკაჩენკო.
შეგახსენებთ, რომ 23 ნოემბერს ევროპარლამენტმა მხარი დაუჭირა რეზოლუციას, რომელმაც რუსეთი ტერორიზმის სპონსორ სახელმწიფოდ ცნო. რეზოლუციას მხარი 575-მა დეპუტატმა დაუჭირა, წინააღმდეგი იყო - 8, ხოლო 24-მა თავი შეიკავა. დოკუმენტში ევროპარლამენტმა აღიარა, რომ რუსეთი უკრაინაში ახორციელებს თავდასხმებს საცხოვრებელ ტერიტორიებსა და სამოქალაქო ინფრასტრუქტურაზე, რის შედეგადაც ათასობით ადამიანი დაიღუპა.
მოამზადა მაკა ბიბილაშვილმა