იანვრის განმავლობაში უკრაინის პორტებიდან მარცვლეულით დატვირთული გემების გასვლის საშუალო მაჩვენებელი 2.7-ია, ანუ პორტებიდან დღეში საშუალოდ მხოლოდ 2-3 გემი გადის - ეს არის ერთ-ერთი ყველაზე დაბალი მაჩვენებელი იმ თვეების განმავლობაში, რაც „მარცვლეულის ინიციატივა“ არსებობს. ამის შესახებ ინფორმაციას უკრაინის აგრარული პოლიტიკის სამინისტრო ავრცელებს.

ეს მაჩვენებელი რუსი ინსპექტორების მიერ მარცვლეულის დერეფნის ხელოვნური ბლოკირებით არის განპირობებული. უკრაინის შავი ზღვის პორტების შესასვლელ-გასასვლელში გემების რიგი შეიქმნა, ინსპექტორების არასაკმარისი რაოდენობის გამო გემების შემოწმების დრო 10-15 დღემდე გაიზარდა.

„ბოლო დღეებში, იანვრის ბოლოსთვის, ვითარება გაუარესდა და გემების დღიური რაოდენობა 2,5-მდე შემცირდა. ეს არის ანტირეკორდული მაჩვენებელი“, - აცხადებენ სამინისტროში.

„მიუხედავად ამისა, იანვარში ერთ გემზე გადაზიდვის საშუალო ტონაჟი დარჩა 37 000 ტონაზე, რაც საუკეთესო მაჩვენებელია დერეფნის ექსპლუატაციის დროს. მაგრამ ამან დადებითად არ იმოქმედა იანვარში გადაზიდვების საერთო რაოდენობაზე. ამრიგად, ახალი წლის პირველ თვეში დერეფნიდან მხოლოდ 2,4 მლნ ტონა მარცვლეული გავიდა, ხოლო სექტემბერსა და ოქტომბერში ეს მაჩვენებელი 4 მილიონ ტონაზე მეტი იყო,“ - აცხადებენ აგრარულ უწყებაში.

იანვარში 540 ათასი ტონა ხორბალი გაიგზავნა, აქედან 61 ათასი ტონა აფრიკაში გაიგზავნა.

მთლიანობაში, მარცვლეულის ინიციატივის ფარგლებში უკრაინამ უკვე გაგზავნა 675 გემი 18,4 მილიონი ტონა ტვირთით. აფრიკის წილი 2,3 მლნ ტონაა, აზია - 5,1 მლნ ტონა, ევროპა - 7,5 მლნ ტონა, ახლო აღმოსავლეთი - 3,4 მლნ ტონა.

უკრაინაში რუსეთის სრულმასშტაბიანი შეჭრის შემდეგ რამდენიმე თვეში, გასული წლის 22 ივლისს, უკრაინამ და რუსეთმა თურქეთის და გაეროს შუამავლობით,  სტამბოლში მიაღწიეს შეთანხმებას შავი ზღვით, ე.წ მარცვლეულის დერეფნით უკრაინიდან მსოფლიოში ხორბლის და სოფლის მეურნეობის სხვა პროდუქციის ექსპორტთან დაკავშირებით.