რადიო „კომერსანტის“ დილის ეთერში ექსპორტის განვითარების ასოციაციის გამგეობის თავმჯდომარე გვანცა მელაძემ საქართველოს საექსპორტო შესაძლებლობებზე ისაუბრა და განაცხადა, რომ ექსპორტის ზრდისთვის საჭიროა ლოგისტიკური ინფრასტრუქტურის განვითარება, შემდეგ კი მარკეტინგული მიმართულების გააქტიურება, რადგან საერთაშორისო ბაზარზე ქვეყნის და ქართული პროდუქტის ცნობადობის გაზრდაა საჭირო.

გვანცა მელაძის თქმით, იაფიან პროდუქციას ფასი ყიდის, ძვირიანს - მარკეტინგი. ამიტომ, პროდუქტის და ქვეყნის ცნობადობის გაზრდის მიმართულებით ბიუჯეტია საჭირო.

„ლოგისტიკური სირთულეების გამო, საქართველო ბაზრების დივერსიფიცირებას ვერ ახერხებს. ძირითადად სოფლის მეურნეობის ექსპორტზე ვართ დამოკიდებული, ეს მალფუჭებადი პროდუქციაა და აქ ძალიან მნიშვნელოვანია, რომ ბაზარი, სადაც პროდუქციის რეალიზაცია მოხდება, ახლოს იყოს.

რაც შეეხება მზა შეფუთულ პროდუქციას, აქ სხვა პრობლემა ემატება. საქართველოს ცნობადობა მსოფლიოში საიმისოდ მაღალი არაა, რომ ამა თუ იმ პროდუქციაზე მოთხოვნა იყოს. რუსული ბაზარი მარტივია. განვითარებულ ბაზრებზე ძალიან დიდი მარკეტინგული ხარჯების გაწევა და კონსიგნაციით მუშაობაა საჭირო, რაც რეალიზაციის შემდეგ თანხების ამოღებას ნიშნავს“, — განმარტავს გვანცა მელაძე.

მისი თქმით, რუსეთის ბაზრის შემთხვევაში კონსიგნაცია არ ხდება ხოლმე. ხშირია შემთხვევა, რომ „ტრეიდერები“ თავად ჩამოდიან და ადგილიდან, ქარხნიდან მიაქვთ პროდუქცია. რაც მწარმოებლისთვის დიდი კომფორტია. მწარმოებლებს არ სჭირდებათ მარკეტინგული ხარჯი, არც ტრანსპორტირების პრობლემის მოგვარება, აწარმოებენ და ადგილზევე ყიდიან.  ფასიც მისაღებია, ვინაიდან ევროპაში ბევრად უფრო მაღალი კონკურენციაა და მოგების მარჟა ბევრად იკლებს, ვიდრე რუსეთის შემთხვევაში.

„რუსულ ბაზარზე  ხარისხის მოთხოვნა არ არის ისეთი მაღალი, როგორც განვითარებულ ქვეყნებში და ეს ყველაფერი „მარტივი ბაზრის“ ერთობლიობას ქმნის. შესაბამისად, ბევრი ბიზნესი ვერც ახერხებს და არც აქვს დივერსიფიცირების სურვილი“, - განაცხადა გვანცა მელაძემ.

ოფიციალური ინფორმაციით, საგარეო ვაჭრობაში 70% იმპორტს უჭირავს, 32%-მდე ექსპორტზე მოდის; თურქეთი საქართველოს #1 სავაჭრო პარტნიორია, მეორე ადგილზე კი რუსეთია.