რუსეთი არის ტერორისტული სახელმწიფო, რომელსაც ხელმძღვანელობს ომის დამნაშავე , - ამის შესახებ აშშ-ში უკრაინის ელჩმა ოქსანა მარკაროვამ CNN -ს განუცხადა და მტკიცებულებად დაასახელა არაერთი ფაქტი, რომ რუსული ძალები კლავენ მშვიდობიან მოსახლეობას, მათ შორის, ბავშვებს, ანადგურებენ საავადმყოფოებს, სამოქალაქო ინფრასტრუქტურას, საცხოვრებელ სახლებს, მშვიდობიან მოსახლეობას.
„ჩვენთვის ნათელია, რომ რუსეთი არის ტერორისტული სახელმწიფო, რომელსაც ხელმძღვანელობს ომის დამნაშავე და ჩვენ დღედაღამ ვმუშაობთ და ვიბრძვით ძლიერად, რათა დავიცვათ ჩვენი მიწა და ჩვენი დემოკრატია... ეს არის სამხედრო დანაშაულებრივი ქმედება. ამიტომ ჩვენ დავიწყეთ გამოძიება უკრაინაში, ამიტომ უკრაინამ ყველა განცხადება წარადგინა ყველა საერთაშორისო სასამართლოში....ყველანი უნდა დაისაჯონ. ვფიქრობ, რთული იქნება ჰააგიდან სახელმწიფოს მართვა. დიახ, რუსეთის პრეზიდენტი ვლადიმერ პუტინი, ყველა იმ რუსთან ერთად, ვინც პასუხისმგებელია, ციხეში უნდა მოხვდეს ომის დანაშაულებისთვის“, - აღნიშნა უკრაინელმა დიპლომატმა.
რუსეთი უკრაინაში 24 თებერვალს, გამთენიისას შეიჭრა და მას შემდეგ განუწყვეტლივ ბომბავს როგორც სამხედრო ობიექტებს, ისე მშვიდობიან მოსახლეობას. მოსკოვი საჯარო განცხადებებში უარყოფს სამოქალაქო ობიექტების მიზანში ამოღებას. გაეროს მონაცემებით, უკრაინა უკვე დატოვა 3.6 მილიონმა ადამიანმა.
უკრაინა რუსეთის ტერორისტ ქვეყნად გამოცხადებას ითხოვს და ჰააგის სასამართლოში ჩივის. სასამართლო პროცესი შედგა, თუმცა პროცესზე არ გამოცხადდა რუსეთის წარმოემადგენელი, რადგან, როგორც ქვეყნის საგარეო საქმეთა სამინისტროს წარმომადგენელი, მარია ზახაროვა, ამბობს, სასამართლოს ამ საკითხზე მსჯელობის ლეგიტიმაცია არ აქვს.
როგორც უკრაინის სახალხო დამცველი აცხდებს, სრული სიზუსტით გროვდება რუსეთის მიერ უკრაინაში ჩადენილი სამხედრო დანაშაულის ყველა ფაქტი და უკრაინა მას სამხედრო ტრიბუნალამდე მიიტანს.
ჰააგაში გაეროს საერთაშორისო სასამართლოს უკრაინაზე რუსეთის თავდასხმის საქმეზე მიღებული გადაწყვეტილებით, რუსეთმა დაუყონებლივ უნდა შეაჩეროს სამხედრო ოპერაციები, თუმცა სასამართლო დადგენილებას რუსეთი ამ დრომდე არ ასრულებს.
რუსეთს უკრაინაში შეჭრის და იქ საომარი მოქმდებების გამო სანქციები დაუწესა ლამის მთელმა მსოფლუიომ, უიშვიათესი გამონაკლისის გარდა.