უკრაინის საგარეო საქმეთა მინისტრმა დიმიტრო კულებამ განაცხადა, რომ რუსეთი უკრაინაში მსგავს ტაქტიკას იყენებს, რასაც სირიაში აკეთებდა. მარიუპოლი ალყაშია, მაგრამ მაინც უკრაინის კონტროლის ქვეშ რჩება, - ამის შესახებ ინფორმაციას “როიტერსი“ ავრცელებს.
დიმიტრო კულებამ ასევე განაცხადა, რომ რუსეთი ჩერნობილთან ახლოს ლოგისტიკური ბაზის შექმნას ცდილობდა.
უკრაინის პირველი დიპლომატის თქმით, მიუხედავად იმისა, რომ რუსეთი და უკრაინა საუბრობენ და ისინი ღიად რჩებიან დიპლომატიის მიმართ, ოფიციალური მოსკოვი კვლავ აყენებს მოთხოვნებს, რომლებიც მიუღებელია.
„უკრაინა მზად არის მოლაპარაკებებისთვის, მაგრამ არ დანებდება” - აღნიშნა კულებამ. უკრაინის საგარეო საქმეთა მინისტრმა აღნიშნა, რომ უკრაინას დახმარება სჭირდება შესაძლო სამხედრო დანაშაულების გამოძიებისა და დამნაშავეების სისხლის სამართლებრივი დევნის კუთხით. მან ასევე განაცხადა, რომ მეტი უნდა გაკეთდეს რუსეთის ეკონომიკაზე დარტყმისთვის.
კულებას თქმით, თუ უკრაინას მეტი თვითმფრინავი ეყოლებოდა, უფრო მეტი მშვიდობიანი მოქალაქე გადარჩებოდა.
უკრაინის პირველ დიპლომატს მიაჩნია, რომ ბელორუსიას არ სურს უკრაინაში ჯარის გაგზავნა, მიუხედავად იმისა, რომ მინსკი რუსეთის ზეწოლის ქვეშ იმყოფება.
Ian.ge