რუსეთმა უკრაინის საზღვართან 92 ათასზე მეტი სამხედრო განათავსა, რომელიც იანვრის ბოლოს, თებერვლის დასაწყისში შეტევისთვის ემზადება. ამის შესახებ უკრაინის თავდაცვის სამინისტრის დაზვერვის მთავარი სამმართველოს ხელმძღვანელმა კირილ ბუდანოვმა Military Times -თან ინტერვიუში განაცხადა.
მისი თქმით, თავდასხმა, როგორც ჩანს, მოიცავს ავიადარტყმებს, საარტილერიო და სატანკო შეტევებს შემდგომი სადესანტო დარტყმებით აღმოსავლეთში, ოდესაზე და მარიუპოლზე, ასევე მცირე შეჭრას ბელარუსის გავლით.
ბუდანოვის თქმით, რუსეთის მასშტაბურმა სამხედრო სწავლებამ „დასავლეთი-2021“-მა აჩვენა, რომ მოსკოვს შეუძლია, ერთდროულად, გადაისროლოს 3500 სამხედრო-სადესანტო და სპეციალური ოპერაციის სამხედრო მოსამსახურე.
მისი თქმით, კრემლი გეგმავს თავდასხმას, რომელიც უნდა გახდეს მეტად მასშტაბური, ვიდრე რუსეთის ნებისმიერი მოქმედება იყო 2014 წელს.
დაზვერვის ხელმძღვანელმა აღნიშნა, რომ კიევი იხილავს სხვადასხვა სცენარებს, თუ როგორ შეიძლება განხორციელდეს რუსეთის თავდასხმა იმის გათვალისწინებით, რომ ქვეყანა გარშემორტყმულია რუსეთის მრავალრიცხოვანი დაჯგუფებებით.
ბუდანოვის თქმით, რუსეთი ზრდის ჯარის და შეიარაღების რაოდენობას ოკუპირებულ ყირიმში და საზღვარზე მცირე მანძილის „ისკანდერების“ და სხვა შეიარაღების მობილიზებას ახდენს. მანვე აღნიშნა, რომ ნებისმიერი მსგავსი თავდასხმა მოჰყვება მხოლოდ სერიულ ფსიქოლოგიურ ოპერაციებს, რომელსაც მოსკოვი უკვე ახორციელებს და რომლის მიზანია უკრაინაში ვითარების დესტაბილიზაცია.
ცნობისთვის, პარასკევს, უკრაინის თავდაცვის ახალმა მინისტრმა ალექსეი რეზნიკოვმა განაცხადა, რომ ჯერჯერობით, ზუსტად არ არის ცნობილი, მიიღო თუ არა რუსეთის პრეზიდენტმა საბოლოო გადაწყვეტილება თავდასხმის შესახებ.
რაც შეეხება რუსეთის პოზიციას, კრემლის პრესმდივანი, დიმიტრი პესკოვი, არ გამორიცხავს პროვოკაციების მცდელობას, რათა გამართლდეს დასავლეთის განცხადებები, რომლებიც რუსეთის მიერ უკრაინაში შეჭრას უკავშირდება. ამის შესახებ პესკოვმა რუსულ ტელეარხ „რასია 1“თან ისაუბრა.
მისი თქმით, ამის გამორიცხვა შეუძლებელია და ფიქრობს, რომ „ხელოვნურად დაძაბვა ხდება“.
„გვაბრალებენ რაღაც უჩვეულო სამხედრო აქტივობას ჩვენ ტერიტორიაზე ისინი, ვინც თავისი შეიარაღებული ძალები ოკეანის გაღმიდან გადმოიყვანა, ანუ ამერიკის შეერთებული შტატები. ეს კი არც თუ ლოგიკურია და არც თუ წესიერი“ , - განაცხადა პესკოვმა.
მანვე აღნიშნა, რომ კრიზისის ძალისმიერი გადაწყვეტის მცდელობას უკრაინის სამხრეთ-აღმოსავლეთით ექნება ყველაზე სერიოზული შედეგები.
„უკრაინა, როგორც ჩანს, ცდილობს კიდევ ერთხელ თავისი პრობლემის ძალისმიერ გადაწყვეტას მიაღწიოს. საკუთარი თავისთვის და ევროპაში ყველასთვის კიდევ ერთი უბედურების შექმნას“ , - განაცხადა პესკოვმა.
მისი თქმით, უკრაინა ამის მიღწევას ცდილობს ნატოს წვრთნების, ასევე შავ ზღვაში ნატოს გემების, ამერიკელი და ბრიტანელი ჯარისკაცების საფარქვეშ, რომელთა რაოდენობა სულ უფრო იზრდება.
წყარო: "ინტერპრესნიუსი"