ფინანსური ბაზრის რუსი მონაწილეები, მათ შორის სანქტ-პეტერბურგის საფონდო ბირჟა (Saint Petersburg Stock Exchange-SPB) და Freedom Holding ყაზახეთში ახალი ბირჟის შექმნას განიხილავენ. ინფორმაციას Frank Media დისკუსიაში მონაწილე ოთხ წყაროზე დაყრდნობით ავრცელებს.
მათი თქმით, პროექტის დეტალები ჯერ არ შემუშავებულა. გამოცემის თანამოსაუბრეები ამბობენ, რომ ბაზრის მონაწილეებმა ახალი ბირჟა შესაძლოა, ყაზახეთში, საერთაშორისო ფინანსურ ცენტრ „ასტანის“ (AIFC) ბაზაზე შექმნან. AIFC ქალაქ ნურ-სულთანში არსებული ტერიტორიაა, სადაც ფინანსურ სექტორში სპეციალური სამართლებრივი რეჟიმი მოქმედებს.
AIFC-ის იურისდიქცია ინგლისისა და უელსის სამართლის პრინციპებს, ნორმებსა და პრეცედენტებს, ასევე, მსოფლიოს წამყვანი ფინანსური ცენტრების სტანდარტებს ეფუძენბა. AIFC-ის ბაზაზე მოქმედებს ცენტრის კუთვნილი ბირჟა (AIX), სადაც ვაჭრობა 85 ემიტენტის ფასიანი ქაღალდების 127 ემისიით მიმდინარეობს. მისი აქციონერები Goldman Sachs და NASDAQ არიან.
რუსული Forbes-ის შეფასებით, ახალი პლატფორმა რუსულ კომპანიებს უცხოური კაპიტალის მიზიდვაში დაეხმარება, ხოლო სანქტ-პეტერბურგის საფონდო ბირჟასა და პროფესიონალ რუს მონაწილეებს საშუალებას მისცემს, ვაჭრობა უცხოური ფასიანი ქაღალდებით განაგრძონ, თუკი უცხოური ინფრასტრუქტურის მხრიდან ტრანზაქციები და გადახდები სრულად აიკრძალება.
წყაროს ცნობით, პროექტის შესაძლო აქციონერებს შორის სანქტ-პეტერბურგის ბირჟა და Freedom Holding-ია, თუმცა ბირჟის შექმნაში მონაწილეობის მისაღებად სხვა ინვესტორებიც მიიწვიეს. ერთ-ერთი თანამოსაუბრე განმარტავს, რომ „SPB Exchange-ს სავაჭრო ტექნოლოგიები, ხოლო Freedom Holding-ს ყაზახეთში კავშრები და კლიენტთა ბაზა აქვს.“ ვარაუდობენ, რომ პროექტის მონაწილეებს შორის უცხოელი მოთამაშეები თავად ყაზახეთიდან, ასევე, ჩინეთიდან და შეერთებული შტატებიდანაც კი იქნებიან.
ერთ-ერთი წყაროს თქმით, რუსეთის ცენტრალურმა ბანკმა ყაზახეთში ბირჟის შექმნის იდეას კონცეპტუალურად, ანუ უცხოური კაპიტალის რუსეთში მიზიდვის შესაძლებლობის გამო დაუჭირა მხარი. გამოცემის თანამოსაუბრე ვარაუდობს, რომ ეს იქნება მცდელობა, „შეიქმნას გაფართოებული რუსული ბაზრის კლონი არარეზიდენტებთან,“ რომელიც უკრაინის ომის დაწყებამდე არსებობდა.
საინვესტიციო ჰაბში აქციებით ვაჭრობა „ყველა დროის ზონაში“ იქნება შესაძლებელი, ხოლო რუსი ბროკერები, რომლებსაც აქვთ ან შექმნიან ფილიალებს ყაზახეთის AIFC-ში, ასევე, კვიპროსსა და სხვა ოფშორულ ზონებში, ინვესტორებს უცხოურ ფასიან ქაღალდებზე წვდომას რუსული ინფრასტრუქტურის გვერდის ავლით შესთავაზებენ. მოსკოვის ბირჟა ყაზახეთის საფონდო ბირჟაზე (KASE) 13%-იან წილს უკვე ფლობს.
Frank Media-ს ერთ-ერთი წყარო ვარაუდობს, რომ გაჩნდება შესაძლებლობა, ახალ ბირჟაზე გაუყინავი ფასიანი ქაღალდები გადაიტანონ, რომლებიც ამჟამად რუსულ პლატფორმაზე არის ბრუნვაში, ასევე, მოხდება ახალი ლისტინგი. ამასთან, ბაზრის ზოგიერთი მსხვილი მონაწილე ყაზახეთის გარდა, სარეზერვო ჰაბად არაბეთის გაერთიანებულ საემიროებს განიხილავს, თუმცა, როგორც წყარო აცხადებს, „ეს უფრო შორეული პერსპექტივაა.“