2022 წლის მარტ-ნოემბერში, ანუ უკრაინაში ომის დაწყების შემდეგ, ევროკავშირის ქვეყნებიდან რუსეთში საქონლის ექსპორტი 47%-ით (36,3 მილიარდ ევრომდე) შემცირდა 2021 წლის ანალოგიურ პერიოდთან შედარებით. ამის პარალელურად ევროპული საქონლის ექსპორტი რუსეთის მეზობელ ქვეყნებში (კერძოდ, ბელარუსი, სომხეთი, ყაზახეთი, საქართველო, უზბეკეთი და ყირგიზეთი) იმავე პერიოდში 48%-ით გაიზარდა (20,3 მლრდ ევრომდე). ამის შესახებ კვლევითი კომპანია Euromonitor International-ის ანგარიშზე დაყრდნობით RBC-ი წერს.

კვლევის თანახმად რუსეთის მეზობელ ექვს ქვეყანაში იმ საქონლის ექსპორტი, რომლის რუსეთისთვის მიწოდება შეიზღუდა, 95%-ით გაიზარდა (თითქმის გაორმაგდა), ხოლო რუსეთში მათი მიწოდება, როგორც მოსალოდნელი იყო, 71%-ით შემცირდა.

როგორც გამოცემა წერს, ევროკავშირიდან რუსეთისთვის საქონლის მიწოდება არათუ შეჩერდა, არამედ გაიზარდა ყოფილი საბჭოთა კავშირის ქვეყნებში რეექსპორტის გზით და ის თვიურად 700 მილიონ ევროს საქონელს იღებს.

სანქციების ანომალია - ასე მოიხსენიებს გამოცემა იმ რეკორდულ მაჩვენებლებს, რომლებიც რუსეთის მეზობელ ქვეყნებში დაფიქსირდა.

მეორადი მსუბუქი ავტომობილების მიწოდება გარკვეული ძრავის პარამეტრებით ლიეტუვადან ბელარუსში გაიზარდა 215%-ით 174 მილიონ ევრომდე;

სმარტფონების მიწოდება ჩეხეთიდან ყაზახეთში გაიზარდა ნულიდან 2021 წელს 164 მილიონ ევრომდე;

პოლონეთიდან ყაზახეთში გარკვეული ტურბორეაქტიული ძრავების ექსპორტი გაიზარდა 219%-ით 140 მილიონ ევრომდე;

საავიაციო ნავთის ექსპორტი საბერძნეთიდან საქართველოში გაიზარდა თითქმის ნულიდან 75,5 მლნ ევრომდე;

ლეპტოპების ექსპორტი ჩეხეთიდან ყაზახეთში გაიზარდა 280%, 67 მლნ ევრომდე.

ამასთან, 2022 წლის პირველ ნახევარში ყაზახეთმა მკვეთრად გაზარდა სმარტფონების ექსპორტი რუსეთში, იტყობინება ყაზახური მედია აგვისტოში. რაოდენობრივი თვალსაზრისით, სმარტფონების ექსპორტი თითქმის 328-ჯერ გაიზარდა.

ევროკავშირს, რუსეთსა და მის მეზობელ ქვეყნებს შორის სავაჭრო ნაკადების გადანაწილების შესახებ მონაცემები აჩენს ვარაუდს, რომ რუსეთის მეზობელი 6 ქვეყანა შეიძლება ნაწილობრივ გახდეს პლატფორმა სანქციებს დაქვემდებარებული ევროპული საქონლის რეექსპორტისთვის - აცხადებენ მკვლევრები.