ელექტროენერგიიის რუსეთიდან იმპორტის 46%-ით ზრდის მიუხედავად, რუსულ ელექტროენერგიას საქართველოს შიდა მოხმარებაში მხოლოდ 2.6% უჭირავს. აღნიშნულის შესახებ საუბარია „საერთაშორისო გამჭვირვალობა-საქართველოს“ მიერ მომზადებულ კვლევაში „საქართველოს ეკონომიკური დამოკიდებულება რუსეთზე: რუსეთ-უკრაინის ომის გავლენა“.

როგორც კვლევაშია აღნიშნული, რუსეთიდან ბუნებრივი აირის იმპორტი 32%-ით გაიზარდა. რუსული გაზის წილი საქართველოს შიდა მოხმარებაში 8%-მდეა;

„ბოლო წლებში რუსული ელექტროენერგიის იმპორტს საქართველოში მოხმარებულ ელექტროენერგიაში მნიშვნელოვანი წილი აღარ უჭირავს. 2021 წელს  საქართველოში მოხმარებულ ელექტროენერგიაში რუსეთიდან იმპორტირებული ელექტროენერგიის წილი მხოლოდ 1.8% იყო, საქართველოს ელექტროენერგიის მთლიან იმპორტში კი მისი წილი 25%-ს შეადგენდა. 2022 წელს საქართველოში მოხმარებულ ელექტროენერგიაში რუსეთიდან იმპორტირებული ელექტროენერგიის წილი 2.6% იყო, ელექტროენერგიის მთლიან იმპორტში კი - 24%.

რაც შეეხება ბუნებრივი აირის იმპორტს, 2018 წელს რუსეთიდან იმპორტირებულ ბუნებრივ აირს საქართველოს ბუნებრივი აირის მთლიან იმპორტში 2.8% წილი ეკავა (ღირებულების მიხედვით). 2021 წელს კი 23.1%-მდე გაიზარდა. 2022 წელს რუსეთიდან საქართველოში ბუნებრივი აირის შემოტანა 32%-ით გაიზარდა. რუსეთიდან სულ 93 მლნ აშშ დოლარის ბუნებრივი აირი შემოვიდა, რაც საქართველოს ბუნებრივი აირის ჯამური იმპორტის 21% იყო. საქართველოსთვის ბუნებრივი აირის მთავარ მომწოდებლად აზერბაიჯანი რჩება, საიდანაც 2022 წელს 349 მლნ აშშ დოლარის ბუნებრივი აირი შემოვიდა,  რაც საქართველოს ბუნებრივი აირის ჯამური იმპორტის 79% იყო. საქართველოს შიდა მოხმარებაში კი რუსულ ბუნებრივ აირს 8%-მდე უჭირავს“, აღნიშნულია არასამთავრობო ორგანიზაციის მიერ მომზადებულ კვლევაში.