ქართულ მეფრინველეობაში საკვების ხარჯი კატასტროფულად ძვირდება. როგორც კომპანია ,,კუმისის“ დამფუძნებელი, მეწარმე ზურაბ უჩუმბეგაშვილი ,,კომერსანტთან“ ამბობს, ამ დროისთვის რუსული ბაზრის მოძიება რეალურად დიდი პრობლემაა გაძვირებული და გართულებული ლოგისტიკის გამო. არსებულ პირობებში კომპანიას ფასის შენარჩუნება უჭირს.

შედარებისთვის, მარტო სიმინდის შემთხვევაში, რუსეთიდან და რუმინეთიდან შემოსატან პროდუქტს შორის სხვაობა 40%, სხვა ქვეყნებში ეს ხარჯი კიდევ უფრო ძვირია.

,,რაც ფრინველთა კვების ბაზარზე ხდება, კატასტროფაა, ამას უკვე გაძვირება არ ჰქვია, ბიზნესი გაძლებაზეა. ცხადია, რუსეთის  ალტერნატივა არის, მაგრამ იმპორტი ძალიან ძვირი ჯდება ლოგისტიკაც მოუხერხებელია. მით უმეტეს, უკრაინაში ომიდან გამომდინარე, უამრავმა ქვეყანამ ექსპორტი შეზღუდა, ძალიან მძიმე სიტუაციაა.  ომამდე ფრინველის კვების სეგმენტში ძირითადი მომწოდებელი  რუსეთი იყო. რაც არ უნდა ვიძახოთ, არასანდო პარტნიორია, იგი ყველაზე ხელსაყრელია ლოგისტიკის მხრივ, 500 კილომეტრიანი დაშორებაა მოწოდებიდან გადაზიდვებს ამარტივებს. ახლა დავიწყეთ ახალი ბაზრის  ძებნა - ზოგი რუმინეთში წავიდა, ზოგიც ყაზახეთში, არგენტინაში და სხვა, ათასობით კილომეტრის გავლა უწევს ტვირთს, რაც დროსთან ერთად, დიდ ფინანსურ რესურსთანაა დაკავშირებული. საწვავიც მუდმივად ძვირდება, რაც დამატებით გვიქმნის პრობლემას“, - ამბობს უჩუმბეგაშვილი ,,კომერსანტთან“.

რაც შეეხება ფასებს, მწარმოებლის ინფორმაციით, პროდუქტი ჯერ კიდევ ომამდე გაძვირდა და ჯერჯერობით ცვლილებისგან თავს იკავებენ, თუმცა სამომავლოდ ისევ მოუწევთ გარკვეული კორექტირების შეტანა, თუ იმპორტთან დაკავშირებული პრობლემა დროულად ვერ მოგვარდება.

,,რუსეთ-უკრაინის ომმა ყველგან შექმნა პრობლემა და ზოგადად, ცხოვრების რიტმი შეცვალა. ეს ეტყობა ყველაფერს - ქუჩებში ტრანსპორტის მოძრაობით დაწყებული, გაყიდვებით დამთავრებული, სიხალვათე იგრძნობა.  ნელ-ნელა ეწურება ხალხს რესურსი, ყველაფერი ძვირდება და ეს თანდათან მოთხოვნასაც დაეტყობა. მარტივად ნამდვილად არ არის საქმე.  ორი უდიდესი მომწოდებელი გვყავს მარცვლეულის სეგმენტში. როცა რუსეთმა 2005 წლის ბოლოს ემბარგო გამოგვიცხადა, ეს ბაზარი დიდწილად სწორედ უკრაინამ ჩაანაცვლა, მაქსიმალურად დაგვიდგნენ გვერდით. ახლა  ისე გამოდის, რომ ომმა ბიზნესს ორივე ხელი ,,მოაჭრა“, ძალიან ძნელია გამოსავალი მოიძებნოს“, - აცხადებს ზურაბ უჩუმბეგაშვილი.

აღსანიშნავია, რომ ფრინველის კვებას  წარმოებული პროდუქტის თვითღირებულებაში 70% უჭირავს.

რაც შეეხება შპს “კუმისი XXI”-ს, საქართველოს ბაზარზე იგი 2005 წლიდან არის წარმოდგენილი. თანამედროვე დონეზე აღჭურვილი საწარმოს საქმიანობაა ქათმის კვერცხის წარმოება.

ფაბრიკა მდებარეობს გარდაბნის რაიონში, სოფელ კუმისში, თბილისიდან სამხრეთ-აღმოსავლეთით 17 კილომეტრის დაშორებით და განლაგებულია 12 ჰექტარზე. 

მარი ჩიტაია