სანქციებით დამძიმებული რუსეთის გადაწყვეტილებას, რომ   ყოფილ საბჭოთა ქვეყნებში მარცვლეულის ექსპორტი დროებით აკრძალოს, ქართულ ბაზარზე ფასების მკვეთრ ცვლილებას გამოიწვევს. ,,პურის მცხობელთა ასოციაციის" ხელმძღვანელი მალხაზ დოლიძე ,,კომერსანტთან ამბობს, რომ ხორბალთან ერთად, საგრძნობლად მოიმატებს სიმინდისა და ქერის ფასი.

დოლიძის ინფორმაციით, მსგავსი საფრთხე ფქვილს არ ემუქრება. გაძვირდება ხორბალი, რომლის უკვე რეკორდულად მაღალ ნიშნულზეა.

,,ომის გამო სტრატეგიულ მარაგებთან დაკავშირებით სიტუაცია რთულდება. ყველა ქვეყანა საკუთარი ბაზრის დაცვას ცდილობს, მათ შორის, რუსეთი, რომელმაც გადაწყვეტილება მიიღო მარცვლეულის ექსპორტის აკრძალვასთან დაკავშირებით. აშკარაა, რომ გაზრდილი   მოთხოვნის გამო რუსეთი შეშფოთებულია და ზომებს მიმართავს.  ვფიქრობ,  ფქვილს არ შეზღუდავენ. რუსეთის რეგიონებში ბევრი კერძო წისქვილია, რომლებიც ფქვილის გაყიდვას ყველა საშუალებით ცდილობს, ლოგისტიკასთან დაკავშირებით  პრობლემა თუ არ შეიქმნება, იმპორტს ამ მხრივ საფრთხე არ ელის“, - ამბობს დოლიძე და დასძენს, რომ ლოგისტიკაში ჯერჯერობით დაბრკოლება უამინდობაა, რუსეთ-საქართველოს საზღვარზე რამდენიმე კილომეტრიანი რიგებია,  ვინაიდან სომხეთის, აზერბაიჯანის და საქართველოს მანქანები ვერ გადაადგილდებიან.

,,გამოიდარებს და გადაზიდვები ჩვეულებრივ გაგრძელდება. პრობლემა ძირითადად  სიმინდისა და ქერის იმპორტთან დაკავშირებით არის მოსალოდნელი, მოგვიწევს ალტერნატიული ბაზრების გამონახვა, რაც ფასებს მკვეთრად გაზრდის. ჩვენს შემთხვევაში პურის ფასს მაინც არაფერი ემუქრება, ნაშთები საკმარისია იმისთვის, რომ სიტუაციას გაუძლონ“, - ამბობს დოლიძე.

ცნობილია, რომ 14 მარტს რუსეთის  პრემიერ-მინისტრ მიხაილ მიშუსტინმა ხელი მოაწერა ბრძანებას, რომელიც ევრაზიის ეკონომიკური კავშირის მეზობელ ქვეყნებში თეთრი და ნედლი შაქრის ექსპორტს 31 აგვისტომდე, ხოლო ხორბლის, ჭვავის, ქერისა და სიმინდის ექსპორტს 30 ივნისამდე კრძალავს.

თუმცა ვიცე-პრემიერ ვიქტორია აბრამჩენკომ განაცხადა, რომ მარცვლეულის ექსპორტი კვოტის ფარგლებში, სპეციალური სავაჭრო-საექსპორტო ლიცენზიებით გაგრძელდება. მთავრობის განცხადებაში ნათქვამია, რომ „ზომები გარე შეზღუდვების ფონზე შიდა სასურსათო ბაზრის დასაცავად მიიღეს.“

მარი ჩიტაია