ფინურმა კომპანია Orion Pharma-მ (OP) რუსული ოფისის ლიკვიდაცია დაიწყო - მისი საბოლოო დახურვა წლის ბოლომდე იგეგმება. როგორც vedomosti წერს, ეს იქნება უცხოური ფარმაცევტული კომპანიის მიერ რუსეთის ფედერაციის დატოვების პირველი გახმაურებული შემთხვევა.
გამოცემის წყაროს ცნობით, ამ დროისთვის კომპანიის ადგილობრივი ოფისის თანამშრომლები გათავისუფლებულია. ეს ინფორმაცია OP-ის ხელმძღვანელობასთან დაახლოებულმა წყარომ გამოცემას დაუდასტურა.
OP რუსეთში 15 წელია მუშაობს. 2021 წელს კომპანია DSM Group-ის მიხედვით უმსხვილესი ფარმაცევტული კომპანიების რეიტინგში 98-ე ადგილზე იყო. 2022 წელს მან 90-ე ადგილზე გადაინაცვლა.
კომპანიის რუსული განყოფილების შემოსავალმა 2021 წლისთვის 4,7 მილიარდ რუბლს მიაღწია, რაც 2020 წლის მაჩვენებლებზე 45%-იან ზრდას აჩვენებს. კომპანიის წმინდა მოგებამ იმავე პერიოდში შეადგინა 121,6 მილიონი რუბლი, 129,7 მილიონი რუბლის წინააღმდეგ ერთი წლით ადრე.
კომპანიის მთავარი პრეპარატი მეტიპრედია, რომელიც განკუთვნილია რევმატოიდული ართრიტის სამკურნალოდ. ანალიტიკურ კომპანია RNC Pharma-ს განვითარების დირექტორის ნიკოლაი ბესპალოვის თქმით, ამ წამალზე რუსეთში საერთაშორისო გენერიკული სახელწოდება მეთილპრედნიზოლონის პრეპარატების გაყიდვევის 82%-ი მოდის შეფუთვების მიხედვით, ხოლო 84%-ი თანხობრივად.
vedomosti წერს, რომ თუ OP დახურავს თავის ოფისს რუსეთში, ეს იქნება პირველი ცნობილი შემთხვევა, როდესაც უცხოური ფარმაცევტული კომპანია დატოვებს რუსეთის ბაზარს. ეს იმ ფონზე, როდესაც 17 ოქტომბერს ჯანდაცვის მინისტრის მოადგილემ სერგეი გლაგოლევმა ისაუბრა იმაზე, რომ ამ ინდუსტრიის არც ერთ უცხოელ მოთამაშეს რუსეთის ბაზარი არ დაუტოვებია. vedomosti-ს მიერ გამოკითხულ ექსპერტებს ასევე არ ახსოვთ შემთხვევა, როდესაც უცხოურმა ფარმაცევტულმა კომპანიამ დახურა რუსული ოფისი ან მთლიანად შეაჩერა მიწოდება.
რუსეთში მიაჩნიათ, რომ ბაზრის დატოვებით უპირველეს ყოვლისა თავად ფარმაცევტული კომპანია დაზარალდება. ბესპალოვის თქმით, რუსეთი ფინური კომპანიისთვის ერთ-ერთი უდიდესი ბაზარია და ნაკლებად სავარაუდოა, რომ იგივე პერსპექტივები ჰქონდეს ევროპაში. 2022 წლის პირველ ნახევარში აღმოსავლეთ ევროპის ბაზარმა და რუსეთმა შეადგინა გლობალური OP გაყიდვების 17%, ანუ 44 მილიონი ევრო, რაც გამომდინარეობს ინვესტორებისთვის პრეზენტაციიდან. ეს კომპანიისთვის სიდიდით მეორე ბაზარია ფინეთის შემდეგ.
ამ დროისთვის, OP აგრძელებს რუსეთში მზა მედიკამენტების იმპორტს, წლის განმავლობაში მიწოდების მოცულობა პრაქტიკულად არ გაზრდილა, თუმცა ბოლო თვეების განმავლობაში სახეზეა კლება.