უკრაინაში მიმდინარე საომარი მოქმედებების გამო ,,ნატახტარს“ უალკოჰოლო ტკბილი სასმელების ექსპორტი შეუმცირდა. დანაკარგის კონკრეტულ ოდენობაზე კომპანიაში ჯერჯერობით არ საუბრობენ და აცხადებენ, რომ მონაცემებს ითვლიან, რაც საბოლოოდ მაისში გახდება ცნობილი. გარკვეული გავლენა ამ მხრივ შესაძლოა რუსეთში შაქრიან სასმელებზე აქციზის დაწესებამაც მოახდინოს, რის შესახებაც რუსული მხარე უკვე ალაპარაკდა.
მიიღე ინფორმაცია უფრო სწრაფად „კომერსანტის“ Telegram-ზე.
თუმცა, როგორც „ ნატახტარის“ კორპორაციულ საქმეთა დირექტორმა ნიკოლოზ ხუნძაკიშვილმა ,,კომერსანტთან“ საუბარში აღნიშნა, რუსეთში აქციზის გადასახადის შემოღება რუსეთში პროდუქტის ფასებზე იმოქმედებს, მაგრამ სერიოზულ გავლენას ვერ მოახდენს. მისი თქმით, აქციზზე მეტად ბიზნესს ომის გამო შეცვლილი ბიზნესგარემო და სამომხმარებლო ბაზარზე გაზრდილი რისკები აზარალებს.
,,გართულებული გადაზიდვებისა და საბანკო გადარიცხვების გამო ექსპორტი თითქმის შეჩერებული იყო, რასაც ამინდის გავლენაც დაემატა, თუმცა ვითარება თანდათან გამოსწორდა. სასმელების ექსპორტი მიმდინარე პერიოდში ისედაც შემცირებული იყო, რადგან სეზონი პასიურია. რამდენით შემცირდა გაყიდვები, ამის დათვლა ჯერჯერობით ადრეა, მაისის ბოლო გვეცოდინება. მხოლოდ ერთი ფაქტორი არ არის, რასაც შეეძლო რეალიზაციის კლება გამოიწვია, კომპლექსურად რამდენიმე საკითხია. რაც შეეხება უშუალოდ აქციზის მოსალოდნელ გაძვირებას, ცხადია პროდუქტის ფასზე აისახება, მაგრამ დიდად ვერ მოახდენს გავლენას. უალკოჰოლო ტკბილი გაზიანი სასმელების იმპორტზე აქციზის განაკვეთი მოქმედებს დიდ ბრიტანეთში და ეს არ არის პრობლემა, სხვა ფაქტორები გაცილებით ნეგატიურ გავლენას ახდენენ, რაც უშუალოდ უკრაინაში მიმდინარე ომმა გამოიწვია“, - აცხადებს ნიკოლოზ ხუნძაკიშვილი ,,კომერსანტთან“.
მისი ინფორმაციით, საექსპორტო პორტფელშიც რუსეთის, უკრაინისა და ბელარუსის წილი ჯამურად 25%-ზე ცოტა მეტია.
ყველაზე მეტი პრობლემა, რაზეც ხუნძაკიშვილი ყურადღებას ამახვილებს, ნედლეულის გაძვირება, გართულებული ლოგისტიკა და მომხმარებლის ქცევის ცვლილებაა.
,,ჩვენი პროდუქცია ძვირადღირებულია და რამდენად მსყიდვითუნარიანი იქნება რუსეთის ბაზარი, ეს არის მნიშვნელოვანი, რაზეც წინასწარ საუბარი რთულია. იმდენად არაპროგნოზირებადია დღევანდელი მდგომარეობა, რომ გამიჭირდება კონკრეტულ ციფრებზე ვისაუბროთ. სასაქონლო ბირჟებზე ფასები მატულობს, ძვირდება შაქარი და სხვა სახის ნედლეულიც. კომპლექსური პრობლემაა, რომელიც გაყიდვებზე გავლენას ახდენს. პირველი დღეების ეფექტი ძალიან მნიშვნელოვანია ნებისმიერი კრიზისის დროს, მით უმეტეს, ექსპორტი რუსეთის მიმართულებით გაჩერებული იყო, ახლა გარკვეული რაოდენობა მიდის, დაგეგმილზე ნაკლებია, მაგრამ არ განულებულა. რუს იმპორტიორებს დიდ პრობლემას უქმნის გაცვლითი კურსის რისკი, ვინაიდან არ იციან, როგორ მოიქცევა რუბლი საშუალოვადიან პერსპექტივაში, მეორეც, მომხმარებლის ქცევა კრიზისული ვითარების დროს შეიცვალა, ესეც შეიმჩნევა, შეიძლება ერთი ტიპის პროდუქტზე მოხმარება შემცირდეს, მეორეზე გაიზარდოს და ა.შ. ამასთან, გართულებული გადაზიდვები, რეალურად მსყიდვითუნარიანობის კლება და სხვა, რაც ჯამში ბიზნესის პერსპექტივას ბუნდოვანს ხდის“, - აცხადებს ნიკოლოზ ხუნძაკიშვილი ,,კომერსანტთან“.
ცნობისთვის, კომპანია „ნატახტარი“ (სს „ლომისი“) ქართული ლუდის და ლიმონათის ბაზრის ლიდერია.
კომპანია საექსპორტო ბაზრებზე წარმოდგენილია 2006 წლიდან.
კომპანიისთვის პრიორიტეტი ადგილობრივი ბაზარია, თუმცა საექსპორტო არეალი 25 ქვეყანას მოიცავს და მათში რუსეთის, უკრაინისა და ბელარუსის ჯამური წილი ¼-ს შეადგენს.
მარი ჩიტაია