ევროკავშირი გეგმავს, რომ ტაჯიკეთში, მსოფლიოში ყველაზე მაღალი კაშხლის ინვესტორი გახდეს - ამის შესახებ ინფორმაციაზე როიტერზე დაყრდნობით გამოცემა euractiv.com ავრცელებს. როგორც ევროკავშირის წარმომადგენლებმა როიტერს განუცხადეს, ინვესტიცია მიზნად ისახავს, რომ დაეხმაროს ცენტრალურ აზიას რუსეთის ენერგეტიკაზე დამოკიდებულების შემცირებაში.
ტაჯიკეთმა გიგანტური ჰიდროელექტროსადგურის როგუნის მშენებლობა 2016 წელს დაიწყო, სადგურს ყოფილი საბჭოთა კავშირში მყოფი ერისთვის სრული ენერგეტიკული დამოუკიდებლობის მინიჭება შეეძლო.
ევროკავშირის საინვესტიციო ფილიალს, ევროპის საინვესტიციო ბანკს (EIB), ჯერჯერობით არ დაუფინანსებია პროექტი, რომლის მთავარი დეველოპერი იტალიური სამშენებლო კომპანია Webuild-ია. თუმცა EIB-ის სპიკერმა განუცხადა როიტერს , რომ ბანკს ახლა ევროკომისიამ სთხოვა, რომ პროექტის „უმსხვილესი ინვესტორი“ გამხდარიყო.
„მოსალოდნელია, რომ როგუნი დაახლოებით 8 მილიარდი დოლარი დაჯდება, საიდანაც 3 მილიარდი უკვე დაიხარჯა“, უთხრა ტაჯიკეთის ენერგეტიკის მინისტრმა დალიორ ჯუმამ როიტერს.
„მიუხედავად იმისა, რომ იგი დღემდე ძირითადად ტაჯიკეთის მთავრობის ობლიგაციებითა და კერძო სესხებით ფინანსდებოდა, პროექტის დასასრულებლად დუშანბეს მთავრობამ ევროკავშირის ფინანსური და ტექნოლოგიური მხარდაჭერა მოითხოვა“ - აღნიშნა მოლაპარაკებებში ევროკავშირის ოფიციალურმა წარმომადგენელმა. EIB-ის სპიკერმა ინვესტიციის მოცულობაზე არ უსაუბრია.
ბანკმა 2014-დან 2020 წლამდე შუა აზიაში დაახლოებით 182 მილიონი ევროს ინვესტიცია განახორციელა, რაც ევროკავშირის 27 ქვეყნის ბლოკის გარეთ, მისი მრავალმილიარდიანი ინვესტიციების მცირე ნაწილია.
ევროკავშირი დაინტერესებულია „ცენტრალური აზიის ენერგეტიკული დამოუკიდებლობის მოპოვებით “, განაცხადა ოფიციალურმა წარმომადგენელმა.
ბრიუსელი და მისი დასავლელი მოკავშირეები უკრაინაში შეჭრის გამო რუსეთის იზოლაციას ცდილობენ.
როგუნის ჰიდროელექტროსადგური, თავისი 335 მეტრი სიმაღლის თიხის ბირთვიანი კლდის კაშხლით, რომელიც დეველოპერების თქმით, დასრულების შემდეგ მას მსოფლიოში ყველაზე მაღალს გახდის, სავარაუდოდ დაასრულებს ელექტროენერგიის ქრონიკულ დეფიციტს ტაჯიკეთში და საშუალებას მისცემს მას ელექტროენერგიის ექსპორტი უზბეკეთსა და ყაზახეთში.
EIB-ის სპიკერმა თქვა, რომ ბანკი ევროკომისიასთან ერთობლივ ინვესტიციას განიხილავს, ევროკავშირის აღმასრულებელმა ხელისუფლებამ დაადასტურა, რომ ბლოკი ღიაა ჰიდროენერგეტიკის როგუნის კაშხლის პროექტის დასაფინანსებლად.
ამ საკითხზე ტაჯიკეთის მთავრობას კომენტარი არ გაუკეთებია.
გაურკვეველია, როდის შეიძლება გადაიზარდოს ევროკავშირის გეგმები რეალურ ინვესტიციებად, მაგრამ ევროკავშირის ოფიციალურმა წარმომადგენელმა თქვა, რომ გადაწყვეტილებების მიღება შესაძლებელია მიმდინარე წლის ბოლო კვარტალში.
თაკო კვაჭანტირაძე