ვახტანგ ჭარაია უარყოფს მოსაზრებას იმის შესახებ, რომ ქვეყნის ეკონომიკურ ზრდაში გადამწყვეტ როლს მიგრანტების, კერძოდ რუსი მიგრანტების, ზრდა თამაშობს. ამის შესახებ ეკონომიკის ექსპერტმა რადიო „კომერსანტის“ ეთერში ისაუბრა.
„რუსების ჩამოსვლას, რა თქმა უნდა, რაღაც ეფექტი აქვს, მათ გარკვეულ თანხა ჩამოიტანეს, ეკონომიკურ „დაბუსტვას“ აკეთებენ, თუმცა, ეს ქვეყნის ორნიშნა ეკონომიკური ზრდის მხოლოდ 1%-ია და არავითარ შემთხვევაში რუსებზე არ ვართ დამოკიდებული 5 ან 10%-ით. ოფიციალური მონაცემებით, ბოლო პერიოდში, რუსეთიდან 112 000 ადამიანი ჩამოვიდა, საიდანაც მხოლოდ ¼-ია ისეთი რუსი, ვინც აქ რჩება, შემოსულების ნახევარი ქართველები არიან, დანარჩენები - მესამე ქვეყანაში გადავიდნენ; საუბარია იმაზეც, რომ რუსებმა საქართველოში 1 მილიარდი დოლარი ჩამოიტანეს. მაგრამ ამ თანხას ისინი ერთბაშად ხომ არ დახარჯავდნენ? ამიტომ, რუსეთის ფაქტორი ქართული ეკონომიკისთვის გადაჭარბებულია“,- განაცხადა ვახტანგ ჭარაიამ.
საქართველოს სატრანზიტო პოტენციალზე საუბრისას ვახტანგ ჭარაიამ განაცხადა რომ, დღეის მდგომარეობით, საქართველო რუსეთს ვერ ჩაანაცვლებს. ექსპერტის თქმით, პირობითად, რუსეთ-უკრაინის ომი მალე რომ დამთავრდეს, ევროპული და აზიური ქვეყნები ისევ რუსეთის გზას დაუბრუნდებიან იმიტომ, რომ ამ გზას თავისი უპირატესობა აქვს - ტვირთი ერთი ქვეყნის გავლით მიდის და მინიმალური ბარიერებია.
ექსპერტი მიიჩნევს, რომ გამოსავალი ახალი დერეფნის შექმნაა, სადაც ერთიანი ტარიფი იქნება და მთელი ტვირთი ერთი ფანჯრის პრინციპით გაივლის.
„საქართველომ და მისმა პარტნიორებმა ერთიანი დერეფნის ჩამოყალიბება თუ შეძლეს, სადაც ერთიანი ტარიფი იქნება და მთელი ტვირთი ერთი ფანჯრის პრინციპით გაივლის, მაშინ შეიძლება იმაზე ვისაუბროთ, რომ ეს ტვირთნაკადი მასშტაბური და გრძელვადიანი გახდება, მაგრამ ეს მარტო საქართველოზე არაა დამოკიდებული“, განაცხადა ვახტანგ ჭარაიამ.
ექსპერტის აზრით, რუსეთის დასანქცირებამ საქართველოს ახალი შესაძლებლობები მრავალი კუთხით გაუხსნა. პირველ რიგში ტრანზიტის მიმართულებით.
„ომის და რუსეთის დასანქცირების გამო საქართველოს მონაკვეთზე ტვირთების გამტარობა რამდენჯერმეა გაზრდილი. თუმცა, ეს ხანგრძლივ პერსპექტივად არ შეიძლება განვიხილოთ. რუსეთის გზის ალტერნატივად საქართველოს გზა რომ იქცეს, ამისთვის ჯერ მნიშვნელოვანი ინფრასტრუქტურული პროექტებია განსახორციელებელი. ჩვენ ამჟამად მხოლოდ იმ ტვირთის 10%-ის გატარება შეგვიძლია, რასაც ომამდე, ევროპასა და აზიას შორის, რუსეთის ტერიტორიაზე ატარებდნენ. შესაბამისად, დღეის მდგომარეობით, ჩვენ რუსეთს ვერ ჩავანაცვლებთ, მაგრამ ის 10%-ი სრულად თუ ავითვისოთ, საქართველოსთვის ძალიან კარგი იქნება“, განაცხადა ვახტანგ ჭარაიამ.
მოამზადა მაკა ბიბილაშვილმა