მსოფლიოს კიდევ ერთი წამყვანი ტრეიდერი, ნიდერლანდური კომპანია, Louis Dreyfus 1-ლი ივლისიდან რუსული მარცვლეულის ექსპორტს შეწყვეტს. ინფორმაციას „ინტერფაქსი“ შვილობილი კომპანია „ლუი დრეიფუს ვოსტოკის“ გენერალური დირექტორის, პაულო გლადჩუკის წერილზე დაყრდნობით ავრცელებს.
გლადჩუკმა წერილობით ფედერაციის სოფლის მეურნეობის მინისტრის პირველ მოადგილე ოქსანა ლუტს მიმართა, რომლის შინაარსსაც უწყება ადასტურებს. ამასთან, Louis Dreyfus-მა რუსეთიდან მარცვლეულის მიწოდების შეჩერებაზე ოფიციალური პოსტი თავის ვებგვერდზე გაავრცელა.
კომპანია წერს, რომ ქვეყანაში „მარცვლეულის ექსპორტთან დაკავშირებული სირთულეები იზრდება“ და ამიტომ განიხილავს ვარიანტებს რუსეთში თავისი ბიზნესისა და მარცვლეულის აქტივების ახალ მფლობელებზე გადაცემის შესახებ. კომპანია რუსეთში, კერძოდ, აზოვის ზღვაზე ტერმინალს ფლობს. განცხადებაში, ასევე, ნათქვამია, რომ პროცესის დასრულებამდე კომპანია ქვეყანაში საქმიანობას გააგრძელებს.
Bloomberg-ის მონაცემებით, 2022 წლის ივლისიდან 2023 წლის თებერვლამდე პერიოდში Louis Dreyfus რუსული მარცვლეულის ტრეიდერთა ათეულში შევიდა, რა დროსაც კომპანიამ 658 400 ტონა მარცვლეულის ექსპორტი განახორციელა.
რუსეთის მარცვლეულის ბაზარს ამერიკული Cargill და კანადური Viterra-ც (ყოფილი Glencore Agriculture) ტოვებენ. მაგალითად, Cargill-მა იმავე 2022 წლის ივლისიდან 2023 წლის თებერვლამდე პერიოდში 1,4 მილიონი ტონა, ხოლო Viterra-მ 2,1 მილიონი ტონა მარცვლეულის ექპორტი განახორციელა. რუსეთიდან, ასევე, კომპანია Archer Daniels Midland-იც (ADM) გადის, რომელიც თავისი ძირითადი ოპერაციების შეწყვეტას, კერძოდ, დამატკბობლებისა და სახამებლის საწარმოში წილის გაყიდვას განიხილავს.
გასული წლის ბოლოს მარცვლეულის უმსხვილესი მწარმოებელი რეგიონების, როსტოვის, კრასნოდარისა და სტავროპოლის ოლქების გუბერნატორებმა პუტინს შესთავაზეს, შეზღუდოს უცხოური კომპანიების მონაწილეობა რუსული მარცვლეულის ექსპორტში. გუბერნატორების აზრით, მთავრობამ აგროინდუსტრიული კომპლექსის კომპანიებში, ძირითადად, მარცვლეულის ექსპორტით დაკავებული არარეზიდენტების პირდაპირი და არაპირდაპირი მონაწილეობის მაქსიმალური წილი 20%-ის დონეზე უნდა შეზღუდოს.
Bloomberg-ის შეფასებით, მარცვლეულის დასავლელი ტრეიდერების რუსეთის ბაზრიდან გასვლა კრემლის გეოპოლიტიკურ გავლენას გააძლიერებს, ხოლო „სურსათის გლობალურ მიწოდებაზე რუსეთის კონტროლს გაზრდის.“ თუმცა ჟურნალისტი და ანალიტიკოსი, ანატოლი ნესმიანი თავის Telegram-არხზე წერს, რომ რუსეთი მარცვლეულის ექსპორტშიც იმავე პრობლემებს წააწყდება, რასაც ნავთობის სექტორში აწყდება.
„თითქოსადა, საშინელი არაფერია, მაგრამ, სავარაუდოდ, მარცვლეულზეც იგივე ამბავი იქნება, რაც ნავთობზე ხდება. კერძოდ, რუსი ექსპორტიორები შეძლებენ მის გაყიდვას დამოუკიდებლად, მაგრამ ფასდაკლება გაგრძელდება და მნიშვნელოვნად გაიზრდება. ასე რომ, მოსავალი დაბალ მარჟას ან საერთოდ ზარალს ნახავს. უბრალოდ, მის მოშორებაზე ვიქნებით, რადგან რუსეთში ასეთი მოცულობის გრძელვადიანი შენახვის საშუალებები არ არის,“ - წერს რუსი ანალიტიკოსი.
ჩიკაგოს სასაქონლო ბირჟის მონაცემებით, მარტის თვეში ხორბლის ფიუჩერსების ფასი 2021 წლის ივლისის მინიმუმამდე დაეცა. 3 აპრილის ვაჭრობის დროს მაისის ფიუჩერსები, დაახლოებით, 2%-ით, 703,6 დოლარამდე გაიზარდა.
Bpn.ge