ბულგარეთისა და პოლონეთისთვის რუსული გაზპრომის მიერ გაზის მიწოდების შეწყვეტას საკუთარი პარტნიორების ენერგორესურსებით შანტაჟს უწოდებს აშშ–ის პრეზიდენტი ჯო ბაიდენი, რაშიც ის კრემლს ადანაშაულებს და მკაცრ რეაგირებას ჰპირდება.
მიიღე ინფორმაცია უფრო სწრაფად „კომერსანტის“ Telegram-ზე.
პრეზიდენტი ბაიდენი ტვიტერზე წერს: „რუსეთი ჩვენს ორ მოკავშირეს ენერგომომარაგების შეწყვეტით დაემუქრა. ნება მომეცით, მკაფიოდ განვაცხადო: ჩვენ არ მივცემთ უფლებას რუსეთს დააშინოს ან დააშანტაჟოს ვინმე მათი სანქციებიდან გამომდინარე. ჩვენ არ მივცემთ მათ საშუალებას, გამოიყენონ ნავთობი, რათა თავიდან აიცილონ საკუთარი აგრესიის შედეგები“.
ტვიტერზე გამოქვეყნებულ კიდევ ერთ პოსტში ბაიდენი წერს, რომ სხვა პარტნიორებთან ერთად გააკეთებს ყველაფერს, რათა რუსეთის აგრესიამ არ გაიმარჯვოს და ევროპელმა პარტნიორებმა ალტერნატიული წყაროებიდან მიიღონ ენერგომატარებლები.
„ჩვენ ვმუშაობთ ქვეყნებთან, როგორიცაა სამხრეთ კორეა, იაპონია და კატარი, რომლებიც მხარს უჭერენ ჩვენს ძალისხმევას დავეხმაროთ ევროპელ მოკავშირეებს, რომლებსაც რუსეთი ემუქრება გაზის შანტაჟით, სხვა გზებით დაიკმაყოფილონ ენერგეტიკული საჭიროებები. აგრესია არ გაიმარჯვებს. მუქარა არ გაიმარჯვებს!“, – წერს ჯო ბაიდენი.
რუსეთის მიერ ევროკავშირის წევრი ქვეყნების ენერგოშანტაჟს აშშ–ის სახელმწიფო მდივანი ენტონი ბლინკენიც გამოეხმაურა და კრემლს არასანდო მიმწოდებელი უწოდა.
„გაზპრომის მიერ ბულგარეთთან და პოლონეთთან გაზის კონტრაქტების ცალმხრივი დარღვევა კიდევ ერთი მაგალითია, რუსეთის მიერ ენერგეტიკის იარაღად გამოყენების, რაც ადასტურებს რუსეთის, როგორც ენერგეტიკული მიმწოდებლის არასანდოობას. აშშ მტკიცედ დგას ჩვენს მოკავშირეებთან და მუშაობს მათი ენერგიის წყაროების დივერსიფიკაციაზე“, – წერს ენტონი ბლინკენი ტვიტერზე.