რუსეთის მიერ უკრაინიდან მარცვლეულის ექსპორტის შეთანხმების შეწყვეტის შემდეგ, ხორბლის საერთაშორისო ფასმა ბირჟებზე ზრდა განაახლა. დღეს დილით ვაჭრობისას, ხორბლის ფიუჩერსების ფასი 5%-ით უკვე გაიზარდა, რაც ბოლო 2 კვირის მაქსიმუმია. 2%-იან ზრდას აჩვენებს სიმინდის ფიუჩერსებიც.
ხორბლის გაძვირების მთავარი მიზეზი რუსეთის მარცვლეულის ექსპორტის შეთანხმებიდან გამოსვლა და ამ ფაქტით გამოწვეული გლობალური შეშფოთებაა. აღსანიშნავია, რომ უკრაინა და რუსეთი მსოფლიოსთვის ხორბლის ერთ-ერთი მთავარი მიმწოდებლები არიან, აგრესორი ქვეყნის გადაწყვეტილების შედეგად კი გლობალური სასურსათო უსაფრთხოება კვლავ საფრთხის ქვეშ დადგა.
ბოლო ინფორმაციით, უკრაინა, თურქეთი და გაერო მარცვლეულით დატვირთული 16 გემის გადაადგილების გეგმაზე შეთანხმდნენ - მედიების ცნობით, გემები საზღვაო ჰუმანიტარულ დერეფანს დღეს, 31 ოქტომბერს გაივლიან.
შეგახსენებთ, 29 ოქტომბერს რუსეთის თავდაცვის სამინისტრომ განაცხადა, რომ რუსეთი უკრაინასთან მარცვლეულის შეთანხმებას წყვეტს. უწყების თქმით, მათ ეს გადაწყვეტილება უკრაინის მხრიდან ანექსირებულ სევასტოპოლში, შავ ზღვაში რუსულ გემებზე დრონებით თავდასხმის შემდეგ მიიღეს.
ევროკავშირმა და გაერომ მოუწოდა რუსეთს, დაუბრუნდეს უკრაინის პორტებიდან მარცვლეულის ექსპორტზე მიღწეულ შეთანხმებას, რადგან ეს ნაბიჯი აღრმავებს მსოფლიო სასურსათო კრიზისს.
გაეროსა და თურქეთის შუამავლობით ივლისში მიღწეული შეთანხმების საფუძველზე, უკრაინული პორტებიდან მარცვლეულის ექსპორტი 1 აგვისტოდან განახლდა. უკრაინის მთავრობის მიერ გასულ კვირას გამოქვეყნებული ინფორმაციით, სტამბოლში დადებული მარცვლეულის შეთანხმების შედეგად, 1-ელი აგვისტოს შემდეგ, უკრაინული პორტებიდან სულ 380 გემი გავიდა. მათ ჯამში აფრიკის, აზიის და ევროპის ქვეყნებს 8,5 მილიონი ტონა საკვები პროდუქტი მიაწოდეს.
ხორბალი
