განახლებული:
თბილისის დროით 20:25 საათზე რუსეთის საგარეო საქმეთა სამინისტროს ვებგვერდის საარქივო ვარიანტი გაიხ0სნა, რომელზეც ბოლო განახლებული ინფორმაცია 2021 წლის დეკემბრით თარიღდება.
–––––––
რუსეთის საგარეო უწყების ოფიციალური საიტი დაახლოებით 2 საათია, მიუწვდომელია. სამინისტროს წარმომადგენლების თქმით, პრობლემა „ტექნიკური სამსახურის უხარისხო მუშაობამ გამოიწვია“.
თბილისის დროით 20:00 საათზე ლავროვის უწყების ოფიციალურ რესურსზე შესვლისას შეცდომას აგდებს. „საიტი უკვე ერთი საათია არ მუშაობს, მიზეზი ტექნიკური პერსონალის უხარისხო მუშაობაა“, – განუმარტეს კრემლთან დაახლოებულ სააგენტო ТАСС–ს საგარეო უწყებაში.
საიტი მას შემდეგ გაითიშა, რაც თბილისის დროით 18:00 საათზე აშშ–ის ელჩისადმი საპასუხო განცხადება გამოქვეყნდა უსაფრთხოების გარანტიებთან დაკავშირებით.
მანამდე, 16 თებერვალს, უკრაინის სახელმწიფო უსაფრთხოების სამსახური აცხადებდა, რომ რუსი ჰაკერების მიერ დაგეგმილი ფართომასშტაბიანი კიბერშეტევა აღკვეთეს, რომლის სამიზნე მთავრობის საიდუმლო ინფორმაცია იყო.
„თავდასხმის მიზანი უკრაინის სახელმწიფო ხელისუფლების უმაღლესი ინსტიტუტების საიდუმლო მონაცემებზე წვდომის მოპოვება იყო“, - აცხადებდნენ უკრაინის სახელმწიფო უსაფრთხოების სამსახურში.
უწყების მტკიცებით, ჰაკერების უკან რუსეთის ფედერალური უსაფრთხოების სამსახური დგას. კიევს მოსკოვი უკრაინის წინააღმდეგ ჰიბრიდული ომის წარმოებასა და კიბერთავდასხმების ორგანიზებაში მანამდეც დაუდანაშაულებია, თუმცა რუსეთი ბრალდებებს უარყოფს.