განსაკუთრებით მნიშვნელოვანი იქნება იმპორტიორების მხრიდან რუსეთის ჩანაცვლება სხვა ქვეყნებით. აღნიშნული შესაძლებელია იყოს, როგორც ყაზახეთი, ასევე თურქეთი და ევროკავშირის ქვეყნები. რუსეთის ჩანაცვლებამ შესაძლოა გამოიწვიოს ფასების ზრდა და მომხმარებლების არჩევანის ცვლილება დაბალი ღირებულების საქონლის მიმართ. ამის შესახებ არასამთავრობო ორგანიზაცია „საზოგადოება და ბანკების“ კვლევაშია აღნიშნული, რომელიც სასურსათო საცალო სექტორის და პირველადი მოხმარების საქონლის ბაზარის მიმოიხილვას ეხება.

მიმოხილვის მიხედვით, რუსეთის აგრესიამ უკრაინაში მიწოდების ჯაჭვში მნიშვნელოვანი პრობლემები წარმოქმნა. 2021 წლის განმავლობაში, საქართველოში რუსეთიდან და უკრაინიდან 300 მლნ. აშშ დოლარის ხორბლის, ზეთის, შოკოლადის და სხვა პირველადი მოხმარების საქონლის იმპორტი განხორციელდა.

„არასტანდარტული გარემოებების გათვალისწინებით, შესაძლებელია, განვიხილოთ გარკვეული საგადასახადო შეღავათების დაწესება, რომ შემცირდეს მოსახლეობაზე ინფლაციური წნეხი, განსაკუთრებით პირველადი მოხმარების საქონლის შემთხვევაში.

საერთო ჯამში, ახალი გამოწვევების ფონზე მნიშვნელოვანია მომწოდებლების დივერსიფიცირება და ბაზრის გაჯანსაღება. გაურკვეველია რა ვადით გაგრძელდება რუსეთზე დაწესებული სანქციები და რა დამატებითი შეზღუდვა დაწესდება აღნიშნული მიმართულებით. შესაბამისად, მნიშვნელოვანია ახალი ბაზრების მოძიებას სახელმწიფოს მხარდაჭერით და მიწოდების ჯაჭვის უსაფრთხოების ზრდა“, — აღნიშნულია კვლევაში.

ორგანიზაციის ინფორმაციით, შაქრის დეფიციტის შემთხვევა, რომელიც ბოლო პერიოდის განმავლობაში დაფიქსირდა, ნათლად აჩვენებს, რომ მომხმარებელთა მოლოდინის მართვა მნიშვნელოვანი გამოწვევაა სექტორში. დიდი აჟიოტაჟის პირობებში, ნებისმიერ საქონელზე შეიძლება მოკლევადიან პერიოდში წარმოიქმნას დეფიციტი. თუმცა, თავისუფალი ვაჭრობის და არსებული რეალობის გათვალისწინებით, „საზოგადოება და ბანკებში“ ფიქრობენ, რომ საქართველოს არ ემუქრება რომელიმე საქონელზე დეფიციტი და ხელოვნური აჟიოტაჟის პირობებში საჭიროა შესაბამისმა უწყებებმა, ისევე როგორც რითეილერთა და დისტრიბუტორთა ასოციაციებმა გააკეთონ შესაბამისი განცხადებები და დაამშვიდონ მოსახლეობა.

ასევე, მნიშვნელოვანია საწვავის გაზრდილი ღირებულება, რომელიც პირდაპირ აისახება პირველადი მოხმარების საქონლის ფასზე. აღნიშნულ პირობებში მთავრობის მხრიდან აქციზის განაკვეთის შემცირება ერთ-ერთი გამოსავალი შეიძლება იყოს.