2022 წლის იანვარში რუსეთიდან საქართველოში 22,382 მლნ აშშ დოლარი გადმოირიცხა, რაც წინა თვესთან შედარებით 17,3 მლნ აშშ დოლარით ნაკლებია. 2021 წლის დეკემბერში აღნიშული ქვეყნიდან საქართველოში 39,701 მლნ აშშ დოლარი ჩაირიცხა.

დღეს, 6 მარტს, რუსეთის ცენტრალურმა ბანკმა ოფიციალურად განაცხადა, რომ ზღუდავს უცხოეთში მყოფი ფიზიკური პირებისთვის, მათ შორის მეუღლის, ახლო ნათესავებისთვის ფულის გადარიცხვას თვეში $5 000–მდე. ბანკის განცხადების თანახმად, ახლო ნათესავებში მოიაზრებიან შვილები, შვილიშვილები, მშობლები, ბებიები და ბაბუები, დები, ძმები, მშვილებლები და ნაშვილებები.

ეკონომისტი აკაკი ცომაია დაწესებულ სანქციებზე „კომერსანტთან“ საუბრობს და ამბობს, რომ იმის გათვალისწინებით, რომ რუსეთი საქართველოსთვის არის მეორე სავაჭრო პარტნიორი, მათთვის დაწესებული სანქციები საქართველოზეც აისახება. რაც შეეხება ფულად გზავნილებზე 5000 დოლარიან ლიმიტს, შეიძლება კონკრეტულად ამ შეზღუდვას მნიშვნელოვანი გავლენა არ ჰქონდეს.

„ზოგადად რუსეთის ეკონომიკაზე დაწესებულ სანქციებს საქართველოს ეკონომიკაზეც დიდი გავლენა ექნება, იმიტომ რომ რუსეთი არის საქართველოს მეორე სავაჭრო პარტნიორი და ფულადი გზავნილების კუთხითაც ძალიან ვართ მათზე დამოკიდებული. გზავნილების მიმართულებით 5000 დოლარიან ლიმიტს შეიძლება მნიშვნელოვანი გავლენა არ ჰქონდეს, რადგან არამგონია ბევრი იყოს ისეთი ადამიანი, ვინც თვეში ამაზე მეტს აგზავნის საქართველოში, თუმცა ვაჭრობის მიმართულებით დიდი გავლენა ექნება.

ფულადი გზავნილები არის ერთ-ერთი მნიშვნელოვანი თემა, რაც პრობლემური იქნება. რუსეთის ეკონომიკა თუ შემცირდება, ცხადია, იქ მომუშავე ადამიანებზეც გავლენას მოახდენს. ფულადი გზავნილების შეზღუდვა და პრობლემები სავაჭრო მიმართულებით ნიშნავს, რომ საქართველოსთვის რუსეთთან ეკონომიკური ურთიერთობის განვითარება უკვე რისკებთან არის დაკავშირებული.

ზოგადად, რუსეთში ეკონომიკის დაზიანების პროცესი უკვე დაწყებულია. მალე, ქვეყნის ეკონომიკა დაიწყებს მყისიერად დაცემას და სავარაუდოა, რომ 5-დან 10%-მდე, შეიძლება მეტადაც შემცირდეს. გრძელვადიანი შედეგი უფრო ცუდი იქნება, ეკონომიკა თანდათანობით კიდევ უფრო მეტად შემცირდება, რადგან რუსეთს მომავალშიც ძალიან გაუჭირდება დანარჩენ მსოფლიოსთან ვაჭრობა. თავის მხრივ საქართველოსთვის რუსეთის ეკონომიკის შემცირება ნიშნავს ექსპორტის და ფულადი გზავნილების ავტომატურად შემცირებას.  ქართული ეკონომიკისთვის აუცილებელია დივერსიფიკაცია, რასაც გარკვეული პერიოდი დასჭირდება. თუმცა რუსეთისთვის დაწესებული სანქციები, თუ სხვა კუთხით შევხედავთ, სასარგებლოცაა საქართველოსთვის. აქამდე უნდა გაეკეთებინა ჩვენს ხელისუფლებას ის, რომ რუსეთის ეკონომიკაზე უფრო ნაკლებად ვყოფილიყავით დამოკიდებული“, - განაცხადა ცომაიამ.

აღსანიშნავია, რომ ქვეყნიდან ვალუტის გატანა რუსეთის ხელისუფლებამ მას შემდეგ შეზღუდა, რაც უკრაინაში მისი შეჭრისა და შემდეგ დასავლეთის მხრიდან დაწესებული უმკაცრესი სანქციების ფონზე რუბლის კურსმა სტაბილურობა დაკარგა.

ნინო თამაზაშვილი