რუსეთის მიერ ოკუპირებულ აფხაზეთში სარკინიგზო ხაზის მასშტაბური რეაბილიტაცია დაიწყო. ამის შესახებ ,,კომერსანტთან“ აუდიტორი აკაკი ჩარგეიშვილი აცხადებს. მისი თქმით, კონკრეტული მიზეზი, რას ემსახურება სარკინიგზო ხაზის აღდგენა, უცნობია, თუმცა არ არის გამორიცხული, სამხედრო ტვირთების მოძრაობით იყოს განპირობებული. ჩარგეიშვილი ოკუპანტი ქვეყნის განზრახვას საქართველოსთვის სერიოზულ საფრთხედ აღიქვამს და დასძენს, რომ აღნიშნულთან დაკავშირებით ქვეყნის მთავრობამ გარკვეული რეაგირება უნდა მოახდინოს და რისკები სათანადოდ შეაფასოს.
,,როგორც ჩანს, რუსეთი შეეცდება ტვირთების მოძრაობას ოკუპირებული აფხაზეთის პორტის გამოყენებით. ნამდვილად არის საყურადღებო ინფორმაცია. ჯერჯერობით არც ერთი განცხადება ამასთან დაკავშირებით საქართველოს მთავრობას არ გაუკეთებია. აფხაზური მხარის განცხადებით, თავიდან ბოლომდე რემონტდება აფხაზეთის რკინიგზა ოჩამჩირის რკინიგზის სადგურამდე. ამიტომ უნდა ვიცოდეთ რა დაშვებით კეთდება, რა გვაქვს ამის საპრევენციოდ, რომელი სამსახურები არიან ჩართული, რომელ ინვესტორს აინტერესებს, რომ აფხაზეთის სარკინიგზო ხაზი სრულად იყოს განახლებული. ჩვენ სად ვართ და რას ვაკეთებთ ამ დროს. გამოდის, რომ გადაწყვეტილი აქვთ სარკინიგზო ხაზის აღდგენა გალამდე. ამ დროს ვიცით, რომ სამხედრო ნაწილია ამ აკვატორიაში, ლოგიკურად მიჭირს დავუკავშირო პოლიტიკურ პროცესებს , მაგრამ საფრთხე არის, რას ნიშნავს რკინიგზის გალამდე მოახლოება ანუ ადმინისტრაციულ საზღვრამდე სათანადოდ უნდა შეფასდეს და რეაგირება მოახდინონ“, - განაცხადა აკაკი ჩარგეიშვილმა.
მისი თქმით, აფხაზეთის რკინიგზა რუსეთისთვის გახდება ლოგისტიკის შემავსებელი და გამაიაფებელი, ვინაიდან სოხუმი საპორტო ქალაქი არ არის, ამიტომ სარკინიგზო ხაზის გაფართოება ხდება.
გარდა ამისა, ჩარგეიშვილი არ გამორიცხავს რუსეთი ითვალისწინებდეს შავი ზღვის არეალში წყალქვეშა ნაღმებთან დაკავშირებით საფრთხეს და ალტერნატივას ეძებდეს.
აფხაზეთის სარკინიგზო ხაზის მშენებლობის შესახებ საქართველოსთვის საფრთხეს ნაკლებად ხედავთ აფხაზეთის ექსპერტთა კლუბის წარმომადგენელი ირაკლი ცქიტიშვილი. მისი ვარაუდით, რკინიგზის აღდგენა შესაძლოა უკრაინის ფაქტორს უკავშირდებოდეს და ამავე დროს წმინდა ეკონომიკური მიზეზიც არსებობდეს, რაზეც რუსული მხარე არ საუბრობს.
,,სამხედრო თვალსაზრისით, რუსები მონდომებული არიან, უფრო ადვილად გაიყვანონ თავიანთი ჯარები გუდაუთიდან უკრაინის მიმართულებით. ამასთან რკინიგზა აფხაზეთში ტურისტული სეზონის წარმატებისთვისაც უაღრესად მნიშვნელოვანია. სტრატეგიული ობიექტია და რუსეთი ყოველთვის ცდილობდა მის გამოყენებას, უბრალოდ, ახლა მეტი მოტივი აქვს ამისთვის, როცა უკრაინაში საომარ მოქმედებებს ატარებს. ჩვენთან მიმართებაში რისკს ნაკლებად ვხედავ, რა სიტუაციაც დღეს საქართველოში ტვირთების გადაზიდვებთან დაკავშირებით არსებობს, ამით არ უნდა შეიცვალოს“, - აცხადებს ირაკლი ცქიტიშვილი ,,კომერსანტთან“.