რუსეთის ფინანსთა სამინისტრომ და საგარეო საქმეთა სამინისტრომ პუტინს შესთავაზეს, რომ ორმაგი დაბეგვრის თავიდან აცილების ხელშეკრულებები ყველა „არამეგობრულ“ ქვეყანასთან შეაჩეროს.

ფინანსთა და საგარეო საქმეთა სამინისტროებში ვარაუდობენ, რომ  პუტინი გამოსცემს ბრძანებულებას ორმაგი დაბეგვრის თავიდან აცილების ხელშეკრულებების შეჩერების შესახებ ყველა იმ ქვეყანასთან, რომლებმაც რუსეთის წინააღმდეგ ეკონომიკური სანქციები დააწესეს. ამის შესახებ რუსეთის ფინანსთა სამინისტროსგან მიღებულ შეტყობინებაშია ნათქვამი, რომელსაც Forbes.ru ავრცელებს

რუსეთი დასავლეთის ქვეყნების მიერ ცალმხრივად დაწესებულ ეკონომიკურ სანქციებს, მათ შორის ევროკავშირის გადაწყვეტილებას მისი ე.წ. ევროკავშირის შავ სიაში შეყვანის შესახებ, რუსეთის ფედერაციის უფლებების დარღვევად მიიჩნევს.

ორმაგი დაბეგვრის თავიდან აცილების ხელშეკრულებები საგადასახადო მოცულობას ამცირებს ერთ ქვეყანაში გადახდილი გადასახადებით. 1990-იანი წლებიდან რუსეთმა ხელი მოაწერა ორმაგი დაბეგვრის თავიდან აცილების შეთანხმებას ათეულობით ქვეყანასთან - შეერთებულ შტატებთან, ევროკავშირის ზოგიერთ ქვეყანასთან, მათ შორის - საფრანგეთთან და გერმანიასთან, გაერთიანებულ სამეფოსთან, შვეიცარიასთან, კანადასთან, იაპონიასთან, ავსტრალიასთან და ახალ ზელანდიასთან.

2022 წელს ზოგიერთი შეთანხმება შეწყდა (მაგალითად, ხელშეკრულება უკრაინასთან, რომელიც ძალაში იყო 1995 წლიდან) ან შეჩერდა (როგორც მოხდა ლატვიასთან შეთანხმების შემთხვევაში).

როგორც Forbs.ru წერს, რუსეთის ფედერაციის ფინანსთა სამინისტრომ პირობა დადო, რომ შეაჩერებს ორმაგი დაბეგვრის თავიდან აცილების ხელშეკრულებებს ქვეყნებთან, რომლებსაც არ სურთ რუსეთთან თანამშრომლობა, რათა მათ შეღავათები ცალმხრივად არ მიეცეთ.

შეგახსენებთ, რომ ორმაგი დაბეგვრის თავიდან აცილების ხელშეკრულება რუსეთის ფედერაციას საქართველოსთან დადებული არ აქვს.

წინა წლებისგან განსხვავებით, საქართველო არც ოკუპანტი რუსეთის „არამეგობრულ“ ქვეყნებს შორის მოიაზრება. მოსკოვში დაფუძნებული კომუნიკაციების განვითარების ეროვნული კვლევითი ინსტიტუტის ანგარიშშია ნათქვამია, რუსეთი 14 მეზობლიდან მინიმუმ 8-სთან კარგ ურთიერთობას ინარჩუნებს. კვლევა ჩატარდა 14 ქვეყანაში, მათგან 8 აღიარებულ იქნა მეგობრულად, ხოლო 4 - ესტონეთი, ლატვია, ლიეტუვა და უკრაინა აშკარა მტრების კატეგორიაში მოხვდა. საქართველო და მოლდოვა შედარებით მეგობრულ სახელმწიფოებად ჩაითვალა. ამასთან, კვლევითი ინსტიტუტის ექსპერტები ხაზს უსვამენ, რომ საქართველოსთან ურთიერთობა გაუმჯობესდა. კვლევა 2023 წლის თებერვალში გამოქვეყნდა.