რუსეთმა საერთაშორისო ვალის ორი გადასახადი დაჩქარებული წესით გადაიხადა, რაც სააგენტო Reuters-მა დეფოლტის თავიდან აცილებილს ბოლო მცდელობად შეაფასა.
რუსეთის ფინანსთა სამინისტრომ განაცხადა, რომ 71,25 მლნ დოლარი ამ ვალუტაში დენომინირებულ ობლიგაციებზე, ხოლო 26,5 მლნ ევრო (28 მლნ დოლარი) ევროში დენომინირებული ევროობლიგაციებზე გადარიცხა. სამინისტროს ცნობით, რუსეთის ეროვნულმა ანგარიშსწორების დეპოზიტარმა, რომელიც ორ ობლიგაციაზე გადახდის აგენტს წარმოადგენს, აღნიშნული თანხა მიიღო.
უწყებამ ეს განახორციელა პროცენტის გადახდამდე ერთი კვირით ადრე, ანუ 27 მაისამდე და სულ რაღაც ხუთი დღით ადრე, ვიდრე აშშ-ის ხაზინის დეპარტამენტი სანქციების ფარგლებში რუსეთს სუვერენული ვალის დოლარში გადახდის ლიცენზიას შეუწყვეტდა, რომლის ვადაც 25 მაისს იწურება.
აშშ-ის ხაზინის სპეციალური ლიცენზიით რუსეთი აქამდე ახერხებდა გადახდის გაგრძელებას, ხოლო საერთაშორისო ობლიგაციების მფლობელებს საშუალება ჰქონდათ, ეს გადახდები მიეღოთ. თუმცა, Reuters-ის ცნობით, ეს გამონაკლისი 25 მაისს ამოიწურება, ხოლო აშშ-ს ხაზინის მდივანმა, ჯანეტ იელენმა ამ კვირაში მიანიშნა, რომ დეპარტამენტმა ლიცენზია შესაძლოა, აღარ გააგრძელოს.
რუსეთის ფინანსთა მინისტრი, ანტონ სილუანოვი აცხადებს, რომ მოსკოვი საგარეო ვალის ვალდებულებებს რუბლებში გადაიხდის, თუკი შეერთებული შტატები სხვა ვარიანტებს დაუბლოკავს და დეფოლტს თავიდან მაინც აიცილებს, რადგან ქვეყანას გადახდის საშუალება აქვს.
რუსეთის სუვერენული ობლიგაციების ერთ-ერთი მფლობელი კომპანია Neuberger Berman-ის აქტივების მენეჯერი, კაან ნაზლი აცხადებს, რომ რუსეთს თავდაპირველად სურდა, უცხოელი ინვესტორებისთვის გადახდები შეეჩერებინა, თუკი ამისთვის საზღვარგარეთ გაყინული რეზერვების გამოყენების უფლება არ მიეცემოდა, თუმცა ეს გადაწყვეტილება შეცვალა და „ამჟამად მისი სტრატეგიაა, როგორმე დეფოლტში დამნაშავე მხარედ არ გადაიქცეს.“
უცხოური აქტივების კონტროლის ოფისმა (Office of Foreign Assets Control-OFAC), რომელიც ხაზინის დეპარტამენტის სტრუქტურაა, ლიცენზია მიმდინარე წლის 2 მარტს გასცა, მისი ვადა კი 25 მაისს იწურება. Bloomberg-ის ცნობით, აშშ-ის ხაზინის ზოგიერთი ჩინოვნიკი OFAC-ის ლიცენზიის განახლებას მხარს უჭერს, რომ რუსეთმა ვალების გადახდით ქვეყანაში შესული უცხოური ვალუტის ხარჯვა გააგრძელოს. ოპონენტები ამბობენ, რომ რუსეთმა წლის ბოლომდე საგარეო ვალზე უცხოურ ვალუტაში, სულ ცოტა, 2 მლრდ დოლარი უნდა დახარჯოს, რომ მოსკოვმა ნავთობისა და გაზის შემოსავალში სხვაობა იგრძნოს.
აპრილის დასაწყისში შეერთებულმა შტატებმა რუსეთს დაუბლოკა შესაძლებლობა, დოლარის ვალდებულებები გაყინული სავალუტო რეზერვებიდან გადაეხადა. მაშინ ხაზინის დეპარტამენტი აცხადებდა, რომ რუსეთმა გადახდებისთვის უნდა გამოიყენოს ის ვალუტა, რომელსაც შიდა რეზერვში ფლობს ან დეფოლტის მდგომარეობაში გადავიდეს.
Reuters-ის შეფასებით, რუსეთის 40 მლრდ დოლარის საერთაშორისო ობლიგაციები ფინანსური დაპირისპირების ცენტრი გახდა დასავლეთის დედაქალაქებსა და მოსკოვს შორის მას შემდეგ, რაც დასავლეთმა უკრაინაში ომის გამო რუსეთს ყოვლისმომცველი სანქციები დაუწესა, ხოლო მოსკოვმა საპირისპირო ზომები მიიღო.
27 მაისის შემდეგ რუსეთს ორ ევროობლიგაციაზე 235 მლნ დოლარის გადახდა 23 ივნისს უწევს.
წყარო: "ბიზნესპრესნიუსი"