რუსეთმა თავის სანქციათა სიას დაუმატა კიდევ 25 ამერიკელი, მათ შორის ჰოლივუდის მსახიობები, შონ პენი და ბენ სტილერი, უკრაინაში შეჭრის გარშემო მოსკოვსა და დასავლეთს შორის მზარდი დაძაბულობის ფონზე.

საგარეო საქმეთა სამინისტრომ 5 სექტემბერს გამოაცხადა, რომ ეს ნაბიჯი პასუხია ვაშინგტონის "მზარდ პირად სანქციებზე რუსეთის მოქალაქეთა წინააღმდეგ".

სანქციების სიას დამატებულ აშშ-ის მოქალაქეებს შორის არიან კონგრესის წევრები, ოფიციალური პირები, ანალიტიკური ცენტრებისა და ბიზნესების წარმომადგენლები.

მსახიობები პენი და სტილერი მოსკოვის მიერ უკრაინაში წარმოებული ომის ხმამაღალი კრიტიკოსები არიან.

შონ პენი უკრაინაში იყო და დოკუმენტურ ფილმს იღებდა, როცა 24 თებერვალს იქ რუსეთი შეიჭრა. პენი ეწვია ბუჩას და ირპინს - ადგილებს, სადაც, გავრცელებული ცნობებით, რუსეთის ძალებმა გამორჩეული სისასტიკე გამოავლინეს სამოქალაქო პირების მიმართ. მოსკოვი უარყოფს სამოქალაქო პირების მიზანში ამოღებას, უხვი მტკიცებულებების მიუხედავად.

სტილერი ივნისში კიევში შეხვდა უკრაინის პრეზიდენტს, ვოლოდიმირ ზელენსკის, და მას თავისი "გმირი" უწოდა.

საერთო ჯამში, რუსეთის სანქციათა სია ამჟამად მოიცავს აშშ-ის 1073 მოქალაქეს.

აშშ-მა, ევროკავშირმა და სხვა ქვეყნებმა მნიშვნელოვნად გაზარდეს თავიანთი ფინანსური, სამოგზაურო, დიპლომატიური და სხვა სანქციები რუსეთის წინააღმდეგ მას მერე, რაც პრეზიდენტმა ვლადიმირ პუტინმა 24 თებერვალს ბრძანება გასცა უკრაინაში ათი ათასობით რუსი სამხედროს შეჭრაზე.

მოსკოვმა პასუხად ანალოგიური ზომები შემოიღო.

radiotavisupleba.ge