რუსეთმა შესაძლოა „მარცვლეულის დერეფნის“ შეთანხმება რუსული ამიაკის ექსპორტისთვის გამოიყენოს, ამის შესახებ ინფორმაციას გამოცემა Finacial Times ავრცელებს. მათივე ინფორმაციით მხარეებს შორის მოლაპარაკება 19 ნოემბერს შედგება.
გამოცემა ოთხ წყაროზე დაყრდნობით წერს, რომ რუსეთი ხელშეკრულების გახანგრძლივებას ამიაკის მილსადენის გახსნის შესახებ კომპრომისის შემთხვევაში დათანხმდება.
გარიგების გახანგრძლივების სანაცვლოდ, რუსეთს შესაძლებლობა ექნება, რომ გამოიყენოს დერეფანი ამიაკის ტრანსპორტირებისთვის უკრაინის კონტროლირებადი ტერიტორიის გავლით. ამიაკის მილსადენმა რუსეთის უკრაინაში შეჭრამდე დაახლოებით 2,3 მილიონი ტონა ამიაკი გადაიტანა, მილსადენის გახსნა მოსკოვს დამატებით 2,4 მილიარდი დოლარის ოდენობის საექსპორტო შემოსავალს მოუტანს იმ დროს, როდესაც დასავლეთის სანქციები მას საკუთარი მარცვლეულის და სასუქის გაყიდვას უფერხებს. მხარეების თანხმობის შემთხვევაში გაერო-სა და თურქეთის შუამავლობით ივლისში პირველად გაფორმებული შეთანხმება ავტომატურად განახლდება.
გაფართოების შესახებ მოლაპარაკებებს გაერო აწარმოებს, გაეროს გენერალურმა მდივანმა ანტონიო გუტიერეშმა მოლაპარაკებები გამართა რუსეთის საგარეო საქმეთა მინისტრთან სერგეი ლავროვთან. ლავროვმა ჟურნალისტებს განუცხადა, რომ გუტიერეშმა მას წერილობითი გარანტიები მისცა აშშ-სა და ევროკავშირის „კარგი განზრახვების“ შესახებ, რაც რუსეთის მარცვლეულისა და სასუქის ექსპორტს დაბრკოლებებს მოუხსნის.
მისი თქმით, გაერომ მიიღო დაპირებები, რომ „ყველა ეკონომიკურ ოპერატორს, რომელიც მონაწილეობს რუსეთის სასუქების, მარცვლეულისა და მიწოდების ჯაჭვებში“, არ დაემუქრება სანქციები რუსული მარცვლეულით ვაჭრობის გამო.
„ეს საშუალებას მისცემს რუსულ გემებს ეწვიონ ევროპულ პორტებს, უცხოურ გემებს - რუსეთის პორტებს, რუსეთის სოფლის მეურნეობის ბანკმა „სრულად იმუშაოს“ და მზღვეველებისგან „ღირსეული“ ტარიფები მიიღონ“- თქვა ლავროვმა.
ამიაკის მილსადენის გახსნა პოლიტიკურად სენსიტიური საკითხია უკრაინისთვის, მას არ სურს რომ რუსეთმა სასუქის გაყიდვით მილიარდობით დოლარი იშოვოს
თაკო კვაჭანტირაძე