ნავთობისა და გაზის გარდა, რუსეთმა შესაძლოა, ზეთის, მარცვლეულის, ლითონის, სასუქის, ქვანახშირისა და ხე-ტყის საექსპორტო გადასახადიც რუბლებში მოითხოვს. ამის შესახებ „დუმის“ სპიკერმა, ვიაჩესლავ ვოლდინმა განაცხადა, რასაც Reuters ავრცელებს.
მან კვლავ გააფრთხილა ევროკავშირი, რომ თუ გაერთიანებას რუსული ბუნებრივი გაზი სურს, საფასური რუბლებში უნდა გადაიხადოს.
როგორც ცნობილია, G7-ის ქვეყნებმა მოსკოვის მოთხოვნის შესრულებაზე უარი განაცხადეს. ევროპას გაზის, დაახლოებით, 40% რუსეთიდან შეაქვს და გადასახადს, ძირითადად, ევროში იხდის. ევროკავშირის განცხადებით, „გაზპრომს“ კონტრაქტების რუბლებში გადაფორმების უფლება არა აქვს.
„ევროპელმა პოლიტიკოსებმა უნდა შეწყვიტონ გამამართლებელი მიზეზების ძებნა და საუბარი იმის შესახებ, თუ რატომ არ შეუძლიათ რუბლებში გადახდა. გაზი თუ გინდათ, იშოვეთ რუბლი,“ - წერს ვიაჩესლავ ვოლოდინი Telegram-ზე გამოქვეყნებულ პოსტში.
ის იქვე აღნიშნავს, რომ რუბლებში ბუნებრივი აირის მოთხოვნა პროცესის მხოლოდ დასაწყისია და ეს რუსეთის ოფიციალურ პოლიტიკად გადაიქცევა.
„უფრო მეტიც, სწორი იქნება, თუკი რუბლებში შესასყიდი საექსპორტო პროდუქციის სიას გავაფართოვებთ ისეთ დარგებში, რაც ჩვენი ქვეყნისთვის მომგებიანი იქნება. სიაში უნდა შევიტანოთ სასუქი, მარცვლეული, საკვები ზეთი, ნავთობი, ქვანახშირი, ლითონი, ხე-ტყე და ა.შ.“ - წერს ვოლოდინი.
მისი თქმით, სანქციებითა და რუსეთის იზოლაციის მცდელობით, იზოლაციაში, რეალურად, დასავლეთი მოექცა.
„მათ ყველაფერი გააკეთეს იმისთვის, რომ აშშ დოლარისა და ევროს მიმართ ჩვენი ნდობა შეერყათ, ახლა კი რუსეთმა თავად თქვა უარი ამ ვალუტით ანგარიშსწორებაზე,“ - აცხადებს „დუმის“ სპიკერი.