ფულის გათეთრების წინააღმდეგ ფინანსურმა სამოქმედო ჯგუფმა (Financial Action Task Force-FATF) ორგანიზაციაში რუსეთის როლი და გავლენა უკრაინის ომის გამო შეზღუდა. ამის შესახებ FATF-ის განცხადებაში არის ნათქვამი, რასაც Frank Media ავრცელებს.
ორგანიზაციის განცხადებით, „რუსეთის ქმედებები ეწინააღმდეგება FATF-ის ძირითად პრინციპებს, რომლებიც გლობალური ფინანსური სისტემის უსაფრთხოების, საიმედოობისა და მთლიანობის უზრუნველყოფას ისახავს მიზნად.“ ამასთან, FATF აღიარებს იმ როლს, რომელიც რუსეთმა, 2003 წელს ორგანიზაციაში გაწევრიანების შემდეგ, ევრაზიის რეგიონში გლობალური ქსელის განვითარებისთვის შეასრულა.
შეზღუდვების შედეგად ორგანიზაციის რუსი წევრები ხელმძღვანელ თანამდებობებს ვეღარ დაიკავებენ და საკონსულტაციო საბჭოებში მონაწილეობას ვერ მიიღებენ. ასევე, ვეღარ ჩაერთვებიან სტანდარტების შემუშავებაში, საექსპერტო შეფასებებში, FATF-ის მმართველობისა და წევრობის შესახებ გადაწყვეტილების მიღებაში.
ამასთან, რუსეთი ორგანიზაციის საექსპერტო განხილვისთვის შემფასებლებს, რეცენზენტებს ან სხვა ექსპერტებს ვეღარ წარადგენს.
განცხადებაში, ასევე, ნათქვამია, რომ FATF მონიტორინგს გაუწევს სიტუაციას და თითოეულ შეხვედრაზე განიხილავს, არსებობს თუ არა ამ შეზღუდვების მოხსნის ან შეცვლის საფუძველი.
FATF, ასევე, ყველა იურისდიქციას სიფხიზლისკენ მოუწიდებს, რომ რომელიმე მონაწილის მიერ სანქციების შესაძლო გვერდის ავლა არა დაუშვან.
ფულის გათეთრების წინააღდეგ ფინანსური სამოქმედო ჯგუფი სამთავრობათაშორისი ორგანიზაციაა, რომელიც დანაშაულებრივი შემოსავლების გათეთრებისა და ტერორიზმის დაფინანსების წინააღმდეგ ბრძოლაში გლობალურ სტანდარტებს ამუშავებს, ასევე, ამ სტანდარტებთან ქვეყნების ეროვნული სისტემების შესაბამისობას აფასებს.
FATF 1989 წელს დაარსდა. მისი სათაო ოფისი საფრანგეთში მდებარეობს.
FATF
