რუსული რუბლი დოლართან მიმართებით გამყარების ტენდეციებს აგრძელებს. უნდა აღინიშნოს, რომ მოცემულ მომენტში რუბლი დოლართან იმაზე მეტად გამყარდა, ვიდრე ეს ომამდე პერიოდში ხდებოდა. რუსეთის ცენტრალური ბანკის მიერ გამოქვეყნებული ინფორმაციის მიხედვით, ერთი ამერიკული დოლარის ღირებულება დაახლოებით 63-65 რუბლის ინტერვალში მერყეობს. ეს მაშინ, როდესაც ომამდე ერთი დოლარის ღირებულება 80 რუბლს აჭარბებდა.
„თიბისი კაპიტალის“ მთავარმა ეკონომისტმა „დილის პალიტრის“ ეთერში განაცხადა, რომ რუბლის გამყარების მიზეზი მათი სავაჭრო ბალანსის ისტორიულად მაღალი დადებითი მაჩვენებელია, რასაც თავის მხრივ, რამდენიმე ფაქტორმა შეუწყო ხელი, მათ შორისაა, დასავლეთის მხრიდან დაწესებული სანქციები, რის გამოც რუსეთში იმპორტი შემცირდა და შესაბამისად ქვეყნიდან ნაკლები კაპიტალი გავიდა. აქვე მეორე ფაქტორი ენერგოპროდუქტებზე ფასების ზრდაა, რის გამოც რუსეთის შემოსავლები გაიზარდა.
„დღევანდელი სიტუაციის გათვალისწინებით შეგვიძლია ვთქვათ, რომ რუსეთის სავალუტო შემოსავლები გაზრდილია, რადგან მსოფლიოში ნავთობისა და გაზის ფასმა მოიმატა. იმპორტის ნაწილში შემცირების ტენდენცია, რადგან სანქციები საკმაოდ მწვავეა, ეს კი ეკონომიკის შემცირებას და შესაბამისად მოთხოვნის კლებას იწვევს. ამასთან, ძალიან ბევრი კომპანია რუსეთში უარს ამბობს მუშაობაზე, რაც თავის მხრივ, იმპორტის შემცირების კიდევ ერთი მიზეზია.
წელს რუსეთში სავაჭრო ბალანსი იქნება დადებითი 230 მილიარდი დოლარის ოდენობით, მაშინ როცა გასულ წლებში დაახლოებით 100 მილიარდი დოლარი იყო. შესაბამისად, შეგვიძლია ვთქვათ, რომ რუსეთის ისტორიაში ასეთი დადებითი ბალანსი უცხოური ვალუტის შემოდინებასა და გადინებას შორის არ ჰქონია. ეს ცხადია დადებითად აისახება გაცვლით კურსზეც“, - აღნიშნა „თიბისი კაპიტალის“ მთავარმა ეკონომისტმა ოთარ ნადარაიამ.