ანაკლიის პორტის მშენებლობა წელსვე დაიწყება, — ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა. პრემიერ-მინისტრის თქმით, პორტის 51% სახელმწიფოს კუთვნილება იქნება, 49 %-ზე საერთაშორისო ტენდერი გამოცხადდება, თუმცა ინვესტორის შემოსვლას არ დაელოდება მთავრობა და სამუშაოები წელსვე დაიწყება.

ფინანსისტი გიგა ბედინეიშვილი „კომერსანტთან“ ამბობს, რომ ანაკლიის პორტის თემის სწორედ ახლა გააქტიურება ბევრ კითხვის ნიშანს ბადებს ანუ რუსეთი, როგორც სატრანსპორტო დერეფანი, ფაქტობრივად, ჩაკეტილია და ახლა უკვე მის ინტერესშია, რომ პროექტი განხორციელდეს.

„ეს პროექტი აშკარაა, რომ გასაკეთებელია, მაგრამ ფაქტია რომ „ქართულმა ოცნებამ“ საქართველო არაინვესტირებად ქვეყანად აქცია, რადგან ასეთი კარგი პროექტი როგორიცაა ანაკლია, ვერ პოულობს ინვესტორებს. მთავრობამ ფაქტობრივად თავის დროზე ჩაშალა ის. როგორც ჩანს კერძო ინვესტორებს ვერ შოულობენ, ამიტომ გადაწყვიტეს 51%-იანი თანამონაწილეობა, თუმცა ეს არ არის საუკეთესო მეთოდი, რითაც ანაკლიის პორტის პროექტი უნდა განხორციელდეს, სახელმწიფოს ასეთ მაღალ ჩართულობას ვგულისხმობ. გავიხსენოთ, რა მოხდა ამ პროექტთან დაკავშირებით, ძირითადად კერძო ორგანიზაციით დაწყებული პროექტი, რომელსაც მხოლოდ სახელმწიფოს მხარდაჭერა სჭირდებოდა, ასეთი სადავო გახდა. საინტერესოა, რომ სწორედ ახლა მოუნდა სახელმწიფოს პროექტის მშენებლობა, თანაც წელსვე.

ტვირთებზე მოთხოვნა მკვეთრად გაზრდილია, რუსეთი როგორც სატრანზიტო დერეფანი ფაქტობრივად, ჩაკეტილია. რუსეთიდან ექსპორტზე მთელი რიგი შეზღუდვებია დაწესებული, ამიტომ, ჩვენი დერეფანი ძალიან მოთხოვნადია ახლა და ეს გამოიხატება გაზრდილ ტვირთებში. მე იმედი მაქვს, რომ ეს ტვირთები ძირითადად ლეგიტიმურია, თუმცა, სამწუხაროდ, ვერ გამოვრიცხავ, რომ ამ ტვირთების რაღაც ნაწილი, არის რუსეთიდან, მესამე ქვეყნების გავლით. იმასაც ვხედავთ, რომ რუსები საქებარ სიტყვებს არ იშურებენ ჩვენი მთავრობის მისამართით. რა თქმა უნდა, რუსეთს ერჩივნა, რომ თვითონ არ დაეკარგა სატრანზიტო მნიშვნელობა და გაეგრძელებინა ნორმალური ვაჭრობა დასავლეთთან, მაგრამ მისმა ბარბაროსულმა საქციელმა ყველაფერი შეცვალა.

ვფიქრობ, ამ შემთხვევაში, რუსეთს ურჩევნია ანაკლია განხორციელდეს და მას ჰქონდეს გავლენა პორტზე. ალბათ, იმედი აქვთ, რომ რაღაც გავლენა სწორედ საქართველოს მთავრობის გავლით ექნებათ“,- აღნიშნა გიგა ბედინეიშვილმა.

ანაკლიის ღრმაწყლოვანი ნავსადგურის ასაშენებლად ინტერესთა გამოხატვა გამოცხადდა. უწყებათაშორისი კომისიის გადაწყვეტილებით, ეკონომიკისა და მდგრადი განვითარების სამინისტრო რამდენიმე თვეში საერთაშორისო კონსულტანტების ჩართულობით, პროექტის საუკეთესო ინვესტორს გამოავლენს. პარალელურად, სახელმწიფო განაახლებს არსებულ საინჟინრო/გარემოსდაცვით კვლევებს და პორტისთვის საჭირო გარკვეულ სამშენებლო სამუშაოებს დაიწყებს.