რუსეთში ავიაგადაზიდვების მთლიანი მოცულობა, ფოსტის ჩათვლით, გასულ წელს, სანქციების ფონზე, 59,42%-ით შემცირდა და 599 050 ტონა შეადგინა.

RBC ფედერალური საჰაერო ტრანსპორტის სააგენტოს მონაცემებზე დაყრდნობით წერს, რომ რუსეთში ავიაგადაზიდვები 2000-იანი წლების დასაწყისის დონემდე დაეცა.

გამოცემის ინფორმაციით, 2000 წელს რუსულმა ავიახაზებმა 2022 წელზე ცოტათი ნაკლები (547 ათასი ტონა), ხოლო 2001 წელს - ცოტა მეტი (614 ათასი ტონა) ავიაგადაზიდვა განახორციელეს.

საჰაერო ტრანსპორტის ფედერალური სააგენტოს მონაცემებით, რუსეთში 2022 წელს მგზავრთა ნაკადი 14,21%-ით - 95,21 მილიონ მგზავრამდე შემცირდა.

„როსსტატის მონაცემებით, 2022 წელს რუსეთის სატრანსპორტო სექტორის მიერ ტვირთის გადაზიდვის მთლიანმა მოცულობამ 7,95 მილიარდი ტონა შეადგინა, რაც მხოლოდ 1,2%-ით ნაკლებია 2021 წელთან შედარებით. უპირველეს ყოვლისა, შემცირდა სარკინიგზო და მილსადენებით მიწოდება, ხოლო საავტომობილო ტრანსპორტით გადაზიდვები 0,3%-ით გაიზარდა“, - ნათქვამია ანგარიშში.

RBC-ის მონაცემებით, 2022 წლის იანვარ-თებერვალში ავიაგადაზიდვები 2021 წლის მაჩვენებელთან შედარებით დაახლოებით 4,5%-ით გაიზარდა. მაგრამ ვითარება მკვეთრად შეიცვალა უკრაინაში ომის დაწყების და რუსეთის წინააღმდეგ სანქციების დაწესების შემდეგ: 2022 წლის მარტში ავიაკომპანიებში ტვირთების ნაკადი წლიური თვალსაზრისით 3,6-ჯერ შემცირდა.

ავიაგადაზიდვებს ტვირთბრუნვის მთლიან მოცულობაში მცირე წილი უკავია. ბოლო 10 წლის განმავლობაში, მაღალი ფასის გამო, ავიაგადაზიდვები ყველა სახის სატრანსპორტო გადაზიდვების 1%-ს შეადგენდა, წერს RBC-ი.