რუსეთში დააპატიმრეს მამა, რომლის შვილმაც ანტისაომარი ნახატი დახატა — ამის შესახებ BBC წერს. ისტორია გასული წლის გაზაფხულზე დაიწყო.


2022 წლის გაზაფხულზე ტულის ოლქის ქალაქ ეფრემოვში მაშა მოსკალევამ, რომელიც იმ დროს მეექვსე კლასში იყო, ხატვის გაკვეთილზე ანტისაომარი ნახატი დახატა. როგორც ბავშვი მამა ალექსეი მოსკალევი ამბობს, ნახატის შესახებ სკოლის მასწავლებელმა დირექტორს შეატყობინა, რომელმაც თავის მხრივ პოლიცია გამოიძახა. ამის შემდეგ მაშა მოსკალევას მამასთან გასაუბრება ჰქონდა როგორც პოლიციას, ასევე მეურვეობის სამსახურსაც.

„მეუბნებოდნენ, ხედავთ, რას ასწავლით ბავშვს, უყურებთ რა დახატა? მე ვეუბნები: რა მოხდა განსაკუთრებული? ის ომის წინააღმდეგია, რა არის აქ ასეთი? ... ჩვენ წაგვიყვანეს მანქანით. მოსწავლეები ფანჯრიდან გვიყურებდნენ, თითქოს ტერორისტები მიჰყავდათ. ჩვენ მივედით პოლიციის უფროსთან. ის მიკითხავდა ნოტაციებს, რომ მე არასწორად ვზრდი ბავშვს, “ - ჰყვება ალექსეი. ამის შემდეგ ალექსეი მოსკალზე შეადგინეს პროტოკოლი მუხლით: „საჯარო მოქმედებები, რომელიც მიმართული რუსეთის ფედერაციის სამხედრო ძალების დისკრედიტაციისკენ“. სასამართლოს გადაწყვეტილებით ალექსეი დააჯარიმეს 32 ათასი რუბლით, იმ კომენტარის გამო, რომელიც სასამართლომ რუსული არმიის დამამცირებლად მიიჩნია.

როგორც ალექსეი ჰყვება სასამართლოს შემდეგ დღეს, მის შვილთან სკოლაში მივიდნენ ФСБ-ს თანამშრომლები, რომლებმაც კიდევ ერთხელ ჩაატარეს მასთან ბავშვის სწორი აღზრდის შესახებ საუბრები, მის გოგონას კი შესთავაზეს, რომ სათავეში ჩასდგომოდა რუსული არმიის მხარდამჭერ რაიმე ახალგაზრდულ გუნდს. მოსკალევას მისამართით ФСБ-ს თანამშრომლების მხრიდან ისმოდა მუქარები, რომ მას შვილს წაართმევდნენ, თავად კი ციხეში ჩასვამდნენ.

დეკემბრის ბოლოს ძალოვნები მოსკალევების სახლში ჩხრეკის ჩასატარებლად მივიდნენ, მამაკაცის თქმით, ამოიღეს დოკუმენტები, ტექნიკა, ასევე ფული. ჩხრეკის შემდეგ მოსკალევები დაკითხვაზე ФСБ-ში გადაიყვანეს. მოგვიანებით ალექსეი მოსკალევზე სისხლის სამართლის საქმე აღძრეს რუსეთის არმიის განმეორებითი დისკრედიტაციისთვის.

მედიის ინფორმაციით, ალექსეი მოსკალევი ამ დროისთვის დრეობითი დაკავების იზოლატორშია, მისი გოგონა მაშა კი, რომელსაც ალექსეი მარტო ზრდიდა, ბავშვთა თავშესაფარში გააგზავნეს.

3 მარტს ცნობილი გახდა, რომ ალექსეი მოსკალევს ერთთვიანი შინა პატიმრობა მიუსაჯეს. სავარაუდოდ თავშესაფრიდან მამასთან დააბრუნებენ შვილსაც.