ამერიკელი სენატორების მიერ მომზადებული კანონპროექტი საგადასახადო შეღავათების გაუქმებას ითვალისწინებს იმ ამერიკული კომპანიებისთვის, რომლებიც რუსეთში კვლავ საქმიანობენ. ინფორმაციას Bloomberg-ი ავრცელებს.
გუშინ გამოქვეყნებული კანონპროექტის ავტორები სენატის საფინანსო კომიტეტის თავმჯდომარე, დემოკრატი, რონ უაიდენი და რესპუბლიკელი სენატორი, რობ პორტმანი არიან. კანონპროექტის მიზანია, შეცვალოს აშშ-ს საგადასახადო სისტემა, რომელიც ტრანსნაციონალურ კომპანიებს საშუალებას აძლევს, მცირე გადასახადები გადაიხადონ, თუკი ისინი გადასახადებს საზღვარგარეთაც იხდიან.
კანონპროექტით, რუსეთი და ბელარუსი უნდა დაემატოს იმ ქვეყნების სიას, რომელშიც ოპერირება კომპანიას უფლებას ართმევს, აშშ-ის გადასახადებში ის თანხა გამოექვითოს, რაც საზღვარგარეთ გადასახადის სახით უკვე გადაიხადა. ეს ქვეყნებია; ჩრდილოეთ კორეა, ირანი, სირია და სუდანი.
სენატორ უაიდენისა და პორტმანის ერთობლივ განცხადებაში ნათქვმია, რომ თუ კომპანიები გადაწყვეტენ, რუსეთში ბიზნესი და გადასახადების გადახდა განაგრძონ, მაშინ ისინი შეერთებულ შტატებში საგადასახადო დაქვითვებს დაკარგავენ. Bloomberg-ის შეფასებით, ეს იმას ნიშნავს, რომ კომპანიები, რომლებიც შემოსავალს რუსეთში იღებენ, აშშ-ში ორმაგ დაბეგვრას დაექვემდებარებიან.
სააგენტო წერს, რომ კანონპროექტი გამაფრთხილებელი სიგნალია კომპანიებისთვის, რომლებიც რუსეთში ოპერირებას განაგრძობენ. მათ შორის არის კომპანია, Koch Industries, რომელსაც რუსეთში მინის ორი ქარხანა აქვს და International Paper, Ilim ჯგუფის თანამფლობელი, რომელიც რუსეთის მერქნისა და ქაღალდის უმსხვილეს ქარხნებს აერთიანებს. იელის უნივერსიტეტის კვლევის მონაცემებით, რუსეთი 600-ზე მეტმა უცხოურმა კომპანიამ დატოვა, თუმცა ათობით ბიზნეს ჯგუფი ქვეყანაში ჯერ კიდევ რჩება.
ამასთან, უაიდენ-პორტმანის კანონპროექტი ითვალისწინებს აშშ-ს ყველა საგადასახადო შეღავათის ჩამორთმევას სანქცირებული პირებისთვის, რომლებიც უკრაინის ომში მონაწილეობენ ან რუსულ კომპანიებს უკავშირდებიან.
„რუსმა ოლიგარქებმა და კომპანიებმა, რომლებიც პუტინს უჭერენ მხარს, ასევე, არ უნდა მიიღონ საგადასახადო შეღავათები შეერთებულ შტატებში,“ - აცხადებენ სენატორები.