რუსეთის პრეზიდენტის მიერ ქვეყანაში ნაწილობრივი მობილიზაციის გამოცხადების შემდეგ რუსეთის ქალაქებიდან პირდაპირ ფრენებზე, უახლოესი დღეების ავიაბილეთები მალევე ამოიყიდა. რუსული „ტელეგრამ“ არხები წერენ იმასაც, რომ ბილეთები გაყიდულია თბილისის მიმართულებითაც. მართალია, შეტყობინებებში არ არის დაკონკრეტებული, მაგრამ ცხადია საუბარია ტრანზიტულ ავიაბილეთებზე.
მოსკოვსა და თბილისს შორის უახლოეს დღეებზე არ იძებნება ბილეთები skyscanner.net-ზეც, რომელიც ერთდროულად ყიდის როგორც პირდაპირი ასევე ტრანზიტულ რეისებზე ბილეთებს.
„კომერსანტი“ დაინტერესდა არის თუ არა დარჩენილი ბილეთების მოსკოვი-თბილისის ტრანზიტულ რეისზე, რომელსაც ქართული ავიაკომპანია Georgian Airways-ის პარტნიორი სომხური ავიაკომპანია Aircompany Armenia ასრულებს.
აღნიშნული რეისი რუსეთ-საქართველოს შორის გადაადგილებისთვის ყველაზე ხელსაყრელია, რადგანაც მოსკოვიდან წამოსულს მგზავრს ერევანში გადაჯდომა სხვა საჰაერო ხომალდში არ უწევს და ის იმავე თვითმფრინავით, ერევანში 30 წუთიანი გაჩერების შემდეგ, ხვდება თბილისში და პირიქით.
Aircompany Armenia-ის ბილეთებს ზიარი კოდის პრინციპით ყიდის Georgian Airways-ის. როგორც 15:20 საათისთვის ირკვევა, Georgian Airways-ს ვებგვერდზე მოსკოვი-თბილისის მიმართულებაზე ხელმისაწვდომია მხოლოდ 1-ელი ოქტომბრიდან დაგეგმილ ფრენებზეა ბილეთები.
ხოლო Aircompany Armenia-ს ვებ-გვერდზე მოსკოვი-თბილისის რეისებზე ბილეთები 16 ოქტომბრიდანაა ხელმისაწვდომი.
აღსანიშნავია, რომ რუსეთსა და საქართველოს შორის პირდაპირი ავიამიმოსვლა 2019 წლიდანაა შეწყვეტილი. ფრენების შეწყვეტის შესახებ ბრძანება რუსეთის პრეზიდენტმა, ვლადიმერ პუტინმა 2019 წლის 21 ივნისს გამოსცა.