უოლ სტრიტის ანალიტიკოსებმა McDonald's-ის 2022 და 2023 წლების მოგებაზე პროგნოზები შეამცირეს. Reuters-ის შეფასებით, ამის მიზეზი რუსეთ-უკრაინის ომია, რის გამოც დასავლური კომპანიების გლობალური ხარჯები იზრდება.
ამ კვირაში Morgan Stanley-მ განაცხადა, რომ სწრაფი კვების კომპანიისგან წელს აქციაზე 9,25 დოლარის,ხოლო 2023 წლისთვის 10,62 დოლარის სუფთა მოგებას მოელის, რაც მიმდინარე წლისთვის 8%-იანი, ხოლო მომავალი წლისთვის 3%-იანი დაცემაა.
მანამდე კვლევითმა კომპანია Gordon Haskett-მა McDonald's-ის 2022 წლის მოგება 5%-ით, ანუ აქციაზე 9,75 დოლარით, ხოლო 2023 წლისთვის 3%-ით, 10,66 დოლარამდე შეამცირა.
ამერიკული ბურგერების ქსელი ერთ-ერთი პირველი იყო, რომელიც მოსკოვში, პოსტსაბჭოთა ეპოქაში გაიხსნა. მიუხედავად იმისა, რომ კომპანიამ რუსეთში 847 რესტორნი დახურა, იჯარასა და 62 000 თანამშრომლის ხელფასს დღემდე იხდის. ის, ასევე,ხელფასს უკრაინელ თანამშრომლებსაც უხდის. ვარაუდობენ, რომ ხარჯი ყოველთვიურად 50 მლნ დოლარს, ხოლო წლის ბოლომდე, მინიმუმ, 450 მლნ დოლარს შეადგენს.
Gordon Haskett-ის მონაცემებით, McDonald's-ის რუსეთისა და უკრაინის რესტორნები, რომლებიც ახლა დახურულია, როგორც წესი, ყოველ წლიურად, დაახლოებით, 310 მლნ დოლარის საოპერაციო მოგებას გამოიმუშავებენ.
ჩიკაგოში დაფუძნებულ კომპანია McDonald's-ს, ასევე, ემუქრება პოტენციური დარტყმები რუსეთში მისი აქტივების ღირებულებაზე, რაც შესაძლოა, შემცირდეს ან ადგილობრივ მფლობელზე გაიყიდოს ანდა მთავრობის მხრიდან კონფისკაციას დაექვემდებაროს. ეს ფაქტორი მოგების შემცირების პროგნოზში Morgan Stanley-ის არ გაუთვალისწინებია.
თუმცა ბანკი McDonald's-ის აქციებს მაინც მიმზიდველად მიიჩნევს, რადგან მათ გაურკვეველ სამომხმარებლო გარემოში გაძლება შეუძლიათ.
McDonald's, სწრაფი კვების სხვა გლობალური ქსელებთან შედარებით, რუსეთთან უფრო მეტად არის დაკავშირებული. ის ქვეყანაში 1990 წელს შევიდა და იქ სწრაფი კვების ობიექტების 84%-ს ფლობს.
სხვა ბრენდები, მათ შორის Starbucks და Burger King რუსეთში ნაკლებად არიან წარმოდგენილი. ისინი რესტორნებს, ძირითადად, დამოუკიდებელ ოპერატორებთან ერთობლივი საწარმოებისა და ფრენჩაიზის ხელშეკრულებებით ფლობენ.
McDonald's-ის შემდეგ, რუსეთში ყველაზე მეტად KFC-ისა და Pizza Hut-ის მშობელი კომპანია, Yum Brandsარის წარმოდგენილი. Gordon Haskett-ის ანალიტიკოსების მონაცემებით, რუსეთისა და უკრაინის ქსელი Yum Brands-ის კონსოლიდირებული საოპერაციო შემოსავლის, დაახლოებით, 3%შეადგენს, რაც, 2021 წლის მაჩვენებლების მიხედვით, დაახლოებით, 64 მლნ დოლარია.
Refinitiv-ის მონაცემებით, 2021 წელს McDonald's-ისგლობალურმა საოპერაციო შემოსავალმა 10,4 მლრდ დოლარს მიაღწია. მიუხედავად იმისა, რომ McDonald's-ის თქმით, რუსეთში ქსელის დახურვა დროებითია, Gordon Haskett-ის ანალიტიკოსების პროგნოზით, რუსეთში სწრაფი კვების რესტორნები 2023 წლამდე არ გაიხსნება.
წყარო: ბიზნესპრესნიუსი
ზარალი
