რუსეთის წყლებში საკონტეინერო გემების საშუალო რაოდენობა, 2021 წლის ნოემბრის პიკთან შედარებით, 60%-ით შემცირდა. ეს მას შემდეგ მოხდა, რაც რამდენიმე უმსხვილესმა ლოგისტიკურმა კორპორაციამ, მათ შორის Maersk-მა, CMA-CGM-მა და Hapag-Lloyd-მა რუსეთთან მუშაობაზე უარი განაცხადეს. მონაცემებს Bloomberg ავრცელებს.

Bloomberg Otkritie ვარაუდობს, რომ აპრილში რუსეთში უცხოური იმპორტის წლიური მაჩვენებელი 80%-ზე მეტად შემცირდებოდა, ანუ იმპორტირებული საქონლის მთლიანი ღირებულება, წინა წლის 27 მლრდ დოლართან შედარებით, სავარაუდოდ, 5 მლრდ დოლარამდე შემცირდა.

ანგარიშის მიხედვით, რუსეთში უცხოური სავაჭრო პარტნიორების მიწოდება 2021 წელს იმპორტის, თითქმის, ნახევარს შეადგენდა, რაც აპრილში, წლის ანალოგიურ პერიოდთან შედარებით, დაახლოებით, 40%-ით შემცირდა. მოსკოვთან ვაჭრობა ჩინეთმაც კი შეამცირა, რომელიც სანქციებს არ შეუერთდა.

Bloomberg წერს, რომ რუსეთში შექმნილი საიმპორტო „კოლაფსის“ მთავარი ბენეფიციარი ბელარუსია. რუსეთის მიმართულებით ბელარუსის ექსპორტი აპრილში ღირებულების თვალსაზრისით 100%-ზე მეტად გაიზარდა. ამ მაჩვენებლით ბელარუსმა თავის ისტორიაში პირველად აჯობა გერმანიას, რომლის ეკონომიკაც, სააგენტოს შეფასბით, 60-ჯერ აღემატება ბელარუსის ეკონომიკას.

წყარო: "ბიზნესპრესნიუსი"