დასავლეთის სანქციების შემდეგ უცხოური სალიზინგე კომპანიები რუსულ ავიაკომპანიებთან ასობით თვითმფრინავზე საიჯარო კონტრაქტებს აუქმებენ.
გადაწყვეტილება უკვე მიიღო ირლანდიურმა AerCap-მა, ანალოგიური ნაბიჯის გადადგმას გეგმავს სინგაპურული სალიზინგო კომპანია BOC Aviation-ი. Reuters-ის ცნობით, აზიური კომპანია BOC Aviation რუსეთში მყოფი თვითმფრინავების დაბრუნებასა და ხელშეკრულების 28 მარტამდე შეწყვეტას მოითხოვს. კომპანია შიშობს, რომ მათი უმეტესობა ევროკავშირის სანქციებით დაზარალდება. ამის შესახებ BOC Aviation-ის განცხადებაში არის ნათქვამი. სალიზინგე BOC აცხადებს, რომ რუსეთში 18 თვითმფრინავი ჰყავს, რაც მის საკუთრებაში არსებული ფლოტის 4,5%-ს წარმოადგენს. მას კონტრაქტები აქვს „აეროფლოტის“ შვილობილ კომპანია Pobeda-სთან, ასევე, Ural Airlines-თან, S7 Airlines-თან, AirBridgeCargo Airlines-სა და Rossiya Airlines-თან.
ანალიტიკური ფირმა Cirium-ის მონაცემებით, რუსულ ავიაკომპანიებს მომსახურეობაში 980 სამგზავრო თვითმფრინავი აქვთ, საიდანაც 777 ლიზინგით არის გაცემული. აქედან ორი მესამედი, ანუ 515 თვითმფრინავი, რომლის საბაზრო ღირებულებაც, დაახლოებით, 10 მლრდ დოლარია, ძირითადად, ირლანდიაში დაფუძნებული კომპანიების საკუთრებაა.
საავიაციო საკონსულტაციო კომპანია IBA-ს მიხედვით, მსოფლიოში უმსხვილესი სალიზინგო კომპანია, AerCap Holdings რუსეთსა და უკრაინაში ყველაზე მეტად, 152 თვითმფრინავით არის წარმოდგენილი. AerCap-მა განაცხადა, რომ სანქციების შესაბამისად, რუსულ ავიაკომპანიებთან სალიზინგო საქმიანობას შეწყვეტს. კომპანიის მონაცემებით, 31 დეკემბრის მდგომარეობით, რუსულ ავიაკომპანიებზე მისი ფლოტის 5% იყო იჯარით გაცემული. AerCap-ის ვებგვერდზე წერია, რომ მთლიან სალიზინგე პორტფელში 2000-ზე მეტი თვითმფრინავი აქვს. მის რუს კლიენტებს შორის არიან Aeroflot, S7 Airlines, Rossiya, Azur Air და Ural Airlines.
Avolon მსოფლიოში სიდიდით მეორე სალიზინგე კომპანიაა. მას 550-ზე მეტი თვითმფრინავის საერთო ფლოტიდან, 20-ზე ნაკლები თვითმფრინავი რუსეთში, ხოლო ერთი ან ორი თვითმფრინავი უკრაინაში ჰყავს. ამის შესახებ Reuters-ს აღმასრულებელმა დირექტორმა, დომნალ სლატერმა განუცხადა. ის შიშობს, რომ SWIFT-ის საშუალებით საერთაშორისო გადარიცხვების სანქციების შედეგად, რუსულ ავიაკომპანიებს გადასახადების გადახდა გაუჭირდებათ.
Dubai Aerospace Enterprise-ის (DAE) მომხმარებლებს შორის, მინიმუმ, სამი რუსული ავიაკომპანიაა, მათ შორის არის Aeroflot. ამის შესახებ კომპანიის ვებგვერდზე წერია.
Novus Aviation Capital-ის თანააღმასრულებელმა მდივანმა, მუნირ კუზბარმა Reuters-ს განუცხადა, რომ კომპანიას რუსეთში თვითმფრინავი არ ჰყავდა, თუმცა სალიზინგო ხეშეკრულებების მასიური გაუქმება გლობალურ საიჯარო განაკვეთებსა და თვითმფრინავების ღირებულებაზე იმოქმედებს.
BPN.GE