რუსეთში ტრანსსასაზღვრო ონლაინ ვაჭრობის ბრუნვა აპრილში, წინა წელთან შედარებით, 51%-ით შემცირდა და 11,7 მლრდ რუბლი (189 969 915 დოლარი) შეადგინა. ამის შესახებ „იზვესტია“ ინტერნეტ სავაჭრო კომპანიების ასოციაციის მონაცემებზე დაყრდნობით წერს.
ამ მონაცემებით, ელექტრონული კომერციის მთლიან მოცულობაში უცხოური შესყიდვების წილი მხოლოდ 3% იყო, მაშინ, როცა 2021 წელს ამ მაჩვენებელმა 13%-ს მიაღწია.
ბრუნვა თითქმის ყველა კატეგორიაში შემცირდა:
ტანსაცმელი და ფეხსაცმელი - 92%-ით
სილამაზე და ჯანმრთელობა - 39%-ით
ავეჯი და საყოფაცხოვრებო საქონელი - 31%-ით
ავტონაწილები – 25%-ით
ციფრული და საყოფაცხოვრებო ტექნიკა - 19%-ით
უცხოური ონლაინ პლატფორმებიდან 2021 წელს რუსებს შორის ყველაზე პოპულარული იყო AliExpress, 201,1 მლრდ რუბლის (3,279,477,306 დოლარის) ბრუნვით, ასევე, Asos, რომლის ბრუნვაც 67,2 მლრდ რუბლს (1,096,729,208 დოლარს) შეადგენდა და eBay, 40 მლრდ რუბლის (652,815,005 დოლარის) ბრუნვით. თუმცა ამჟამად რუსეთში მუშაობას მხოლოდ AliExpress განაგრძობს.
რუსეთის ეკონომიკური განვითარების სამინისტრომ ონლაინ-მოვაჭრეთა ასოციაციის მონაცემები გაბერილად მიიჩნია. უწყების ცნობით, უცხოურ ონლაინ მაღაზიებში რუსების შესყიდვები წლის განმავლობაში 51%-ით კი არა, 30-35%-ით შემცირდა. სამინისტრომ ეს ტენდენცია რუბლის კურსის მაღალი ცვალებადობითა და სანქციების გამო გადახდის პრობლემებით ახსნა.
ეკონომიკის სამინისტრო არ გამორიცხავს, რომ რუსეთის ბაზრიდან გასული უცხოური საქონელი ევრაზიის ეკონომიკური კავშირის ქვეყნების პროდუქციამ ჩაანაცვლოს, რომელშიც რუსეთი, სომხეთი, ბელარუსი, ყაზახეთი და ყირგიზეთი არის გაწევრიანებული.
Infoline-Analytics-ის ხელმძღვანელმა, მიხაილ ბურმისტროვმა „იზვესტიასთან“ ინტერვიუს დროს ეჭვი გამოთქვა იმაზე, თითქოს ევრაზიული კავშირის პროდუქციას ევროპული და ამერიკული საქონლის ჩანაცვლება შეუძლია. თუმცა ის არ გამორიცხავს იმ სქემების შექმნას, რომლითაც უცხოური პროდუქცია რუსეთს კავშირის წევრი ქვეყნების მეშვეობით მიეწოდება.