შემდეგი ეკონომიკური რყევა რუსეთში, სავარაუდოდ, შრომის ბაზრის გავლით მოხდება. უმუშევრობა რუსეთში მომდევნო თვეების განმავლობაში გაძლიერდება და ახალ სირთულეებს მოუტანს ერს, რომელიც მთელი რიგი შოკებით უკვე დაზარალდა.
Bloomberg-ის გამოკითხვის მიხედვით, ქვეყანაში მიმდინარე წლის პირველ კვარტალში უმუშევრობა, სავარაუდოდ, დეკადის განმავლობაში პირველად, 9%-ს გადააჭარბებს.
მოსკოვის სტრატეგიული კვლევების ცენტრის შეფასებით, მიმდინარე წელს რისკის წინაშე 2 მილიონი სამუშაო ადგილი აღმოჩნდება. დასაქმების ბაზარი აღდგენას, სავარაუდოდ, 2023 წლიდან დაიწყებს. აღსანიშნავია, რომ თებერვლის ბოლოს რუსეთს მხოლოდ 3 მილიონი უმუშევარი ჰყავდა, რაც რეკორდულად დაბალ მაჩვენებელთან ახლოს იყო.
თუმცა, რუსეთის უკრაინაში შეჭრამ ქვეყნის ეკონომიკა თანამედროვე ისტორიაში ერთ-ერთი ყველაზე ღრმა რეცესიისკენ წაიყვანა. რყევა დამსაქმებლებს შემცირებული სამომავლო პერსპექტივის წინაშე აყენებს, რადგან ინფლაციამ შინამეურნეობების ბიუჯეტი გაარღვია, უცხოურმა ბიზნესებმა ოპერაციები შეაჩერეს, ხოლო სანქციებმა რუსეთის წვდომა ტექნოლოგიებზე და ფინანსებზე შეამცირეს.
დასაქმების მცოცავი კრიზისი ქვეყანაში ეტაპობრივად ვითარდება, რაც ნაწილობრივ პუტინის თამაშის გეგმას უკავშირდება, რომელიც წინა ვარდნის დროს გამოიყენა და სავარაუდოდ, ახლაც გამოიყენებს. მთავრობისგან ზეწოლის ფონზე, ფირმები თანამშრომლების გათავისუფლების ნაცვლად ხელფასებს შეამცირებენ და ნახევარ განაკვეთზე ან აუნაზღაურებელ შვებულებებზე გადავლენ. ამასთან, ბევრი უცხოური კომპანია, რომელმაც რუსეთის ბაზარი დატოვა, ჯერჯერობით თანამშრომლებისთვის ხელფასის გადახდას განაგრძობს.
შრომის სამინისტრო ვარაუდობს, რომ მარტის ბოლოს თითქმის 100,000 დასაქმებული გათავისუფლდა სამსახურიდან და მხოლოდ 14,000-ს მოუწია აუნაზღაურებელ შვებულებაში გასვლა. სამინისტროს მიხედვით, დამსაქმებლები ჯერჯერობით 50,000-მდე თანამშრომლის გათავისუფლებას გეგმავენ.
ასევე, გაუარესებული დემოგრაფია და ასობით ათასი ადამიანის ქვეყნიდან გადინება დასაქმების ბაზარზე კიდევ უფრო გაზრდის ზეწოლას, განსაკუთრებით, თუ მიგრანტი მუშაკებისთვის რუსეთი არასასურველი დანიშნულება გახდება.
მაკროეკონომიკის და მოკლევადიანი პროგნოზების ცენტრის ანალიზის მიხედვით, გამოცხადებული ვაკანსიების რაოდენობა მარტის შუა რიცხვებიდან თვის ბოლომდე, წინა თვესთან შედარებით, მეხუთედით შემცირდა.
ინფლაციასთან ერთად, უმუშევრობა რუსებისთვის ახლა მთავარი საზრუნავია. კონტრასტისთვის, თებერვალში სამსახურის დაკარგვა VTsIOM-ის შიშების ყოველთვიურ ინდექსში თითქმის ყველაზე ბოლოს ფიქსირდებოდა.
წყარო: bloomberg businessformula.ge