რუსეთმა, შესაძლოა, ვაშლის იმპორტს შეზღუდვა დაუწესოს. ყოველ შემთხვევაში, ასეთი მოთხოვნით რუსმა მეხილეებმა მიმართვა უკვე გაუგზავნეს ქვეყნის პრემიერ მიშუსტინს. ამის არგუმენტად ბიზნესმენები ხილის მოყვანისთვის საჭირო სასუქებისა და შხამქიმიკატების 50%–ით გაძვირებას ასახელებენ, რაც მათ მიერ მოყვანილი ვაშლის თვითღირებულებას კილოგრამზე 30 რუბლამდე სწევს.

რუსი პარტნიორების პოზიცია ცნობილია ქართველი ექსპორტიორებისთვისაც. თუმცა „ქართული ხილის“ თანადამფუძნებლი სოსო მანჯავიძე ექსპორტთან დაკავშირებულ პრობლემას რუსეთიდან, უშუალოდ ამ მიზეზით, არ ელოდება.

„რუსეთი საქართველოსთვის მიიჩნევა, როგორც არასანდო პარტნიორი, შეიძლება შეგვზღუდონ, ბაზარი დაგვიკეტონ და სხვა. შეიძლება ამით დავზარალდეთ და არა გადასახადის ზრდით, რასაც ბოლო პერიოდში ისედაც ველოდით. ასეთი არასასიამოვნო სიახლისთვისაც მზად ვართ“, – განაცხადა „კომერსანტთან“ საუბარში სოსო მანჯავიძემ.

მისი თქმით, შხამ ქიმიკატების შემცველობასთან დაკავშირებით ქართული ხილი რუსეთის ფიტო-სანიტარულმა სამსახურებმა შეამოწმეს და დამაკმაყოფილებელი შედეგი აჩვენა.

„პესტიციდები დიდი პრობლემაა, ამიტომ ყველა ქვეყანა, მათ შორის რუსეთიც, ცდილობს, ზომები გაამკაცროს. აღნიშნულთან დაკავშირებით დიდი მუშაობა მიდის ადგილობრივ ბაზარზეც, გარემოს დაცვისა და სოფლის მეურნეობის სამინისტრო აქტიურ ნაბიჯებს დგამს, რომ კონტროლი გააძლიეროს. პრობლემა ძირითადად მცირე ფერმერულ მეურნეობებს უკავშირდება, რადგან ცდილობენ, მალე დაამწიფონ ხილი, ბევრი მოსავალი მიიღონ და ამისთვის ჭარბად იყენებენ პესტიციდებს, რაც დაუშვებელია. მთავრობის დონეზე დიდი მზაობაა და ალბათ, ეს პრობლემაც მოგვარდება, სხვა მხრივ ჩვენ რუსეთის ბაზარზე არანაირი დაბრკოლება არ გვაქვს“, - აცხადებს ქართული ხილის ექსპორტიორი.

სოსო მანჯავიძის ინფორმაციით, ამ ეტაპზე ყველაზე დიდი რაოდენობით ქართული ვაშლი სწორედ რუსეთში იყიდება. 

როგორც რუსული მედია წერს, რუსი მეხილეების პოზიცია განპირობებულია ვაშლის წარმოების გაზრდილი თვითღირებულებით, რის გამოც დიდი პრობლემა აქვთ. კერძოდ, თუ ადგილზე 1 კგ. ვაშლის სარეალიზაციო ფასი 25 რუბლია, თვითღირებულება 30 რუბლს შეადგენს და ამით ადგილობრივი წარმოება ზარალდება.

ცნობილია, რომ ყველაზე მეტი ქართული ვაშლი შარშანაც რუსეთში გაიყიდა. გარემოს დაცვისა და სოფლის მეურნეობის სამინისტროს მონაცემებით, 2020 წლის 1–ლი აგვისტოდან 2021 წლის 21 თებერვლამდე პერიოდში განხორციელდა 13 ათასი ტონა ვაშლის ექსპორტი, რაც რეკორდულია უკანასკნელი 20 წლის მაჩვენებლების მიხედვით და რომლის ღირებულებამ $5.6 მლნ შეადგინა.

2020 წელს წარმოებული ვაშლის ექსპორტი ძირითადად განხორციელდა რუსეთის ფედერაციაში, კერძოდ 12.5 ათასი ტონა.

მარი ჩიტაია