ესპანური ჰოლდინგი Inditex რუსეთში Zara-ს ტანსაცმლის მაღაზიების გახსნას გეგმავს. ამის შესახებ ინფორმაციას Izvestia წყაროზე დაყრდნობით ავრცელებს. გამოცემა წერს, რომ Zara ბაზარს შესაძლოა სხვა ბრენდით დაბრუნდეს - მაგალითად ისე, როგორც სწრაფი კვების რესტორნების ქსელი McDonald's და საიუველირო სახლი Pandora. Inditex-მა უკრაინაში დაწყებული ომის გამო რუსეთში მუშაობა მარტის დასაწყისში შეაჩერა.
როგორც გამოცემას წყარომ განუცხადა, Zara-ს რუსეთში დაბრუნება მაღაზიების ადგილობრივ პარტნიორზე გაყიდვით შეუძლია. ასევე, ესპანურ Inditex-ს შეუძლია ბიზნესი ახალ იურიდიულ პირზე დაარეგისტრიროს.
„როგორც McDonald's და Pandora-ს შემთხვევაში, ბიზნესი შეიძლება გადაეცეს სათავო ოფისის პარტნიორს. რუსეთში სწორედ ის გაყიდის კომპანიის საქონელს, მაგრამ განსხვავებული ნიშნით“, - განუცხადა გაზეთს წყარომ.
ამასთან, სავაჭრო ცენტრების გაერთიანების ხელმძღვანელმა, ბულატ შაკიროვმა ჟურნალისტებს განუცხადა, რომ Zara-ს წარმომადგენლებს მაღაზიების უახლოეს პერიოდში გახსნის შესახებ ოფიციალურად არ გამოუცხადებიათ.
მოდის საცალო ვაჭრობის კომპანიამ რუსეთში 502 მაღაზია დახურა და ონლაინ გაყიდვები შეწყვიტა. Inditex-ს ტანსაცმელს Zara, Bershka, Pull and Bear, Stradivarius, Massimo Dutti, Oysho ბრენდებით ყიდის.
19 მაისს ცნობილი გახდა, რომ პოლონური ტანსაცმლის მწარმოებელი LPP Group, რომელიც Reserved, Cropp, House, Mohito და Sinsay ბრენდებს მართავს, რუსულ განყოფილებას ჩინურ კონსორციუმს მიყიდის. მათ საკუთრებაში არსებული ბრენდების მაღაზიები მომავალ შაბათ-კვირას გაიხსნება. LPP ჯგუფმა ყველა სავაჭრო ობიექტი რუსეთში მარტის ბოლოს დახურა.
იმავე დღეს მაკდონალდსის კორპორაცია (MCD.N) თავის რუსულ ბიზნესს მის ამჟამინდელ ლიცენზიანტს ალექსანდრე გოვორს მიჰყიდის და რესტორნები ახალი ბრენდის ქვეშ იმუშავებენ, რაც ქვეყანაში მაკდონალდსის ყოფნას დაასრულებს.