საქართველოს სახელმწიფო ელექტროსისტემის სტრატეგიული დაგეგმვისა და ანალიზის დეპარტამენტის უფროსმა გიორგი ვახტანგაძემ რადიო „კომერსანტის“ ეთერში გადაცემაში „პროფესიონალები“ განაცხადა, რომ სეზონის პერიოდიდან გამომდინარე, საქართველოს უწევს ძირითადად რუსეთის ან აზერბაიჯანის ელექტროსისტემებთან ოპერირება.
„ზამთრი სეზონის პერიოდიდან გამომდინარე, პარალელურ რეჟიმში, ძირითადად რუსეთის ან აზერბაიჯანის ელექტროსისტემებთან ვოპერირებთ. რუსეთის და ყოფილი დსთ-ს ქვეყნების სისტემები უფრო ფართო მოცულობის და მასშტაბური სისტემებია და მათთან ოპერირება საიმედოობის კუთხით უფრო სარგებლის მომტანია. თუმცა, აზერბაიჯანის სისტემებიც ჩვენს სისტემასთან შედარებით 2-ჯერ მძლავრია და ერთ-ერთ მათგანთან პარალელური ოპერირება ძალიან მაღალი საიმედოობის მომტანია ქვეყნისთვის,“ განაცხადა გიორგი ვახტანგაძე.
გადაცემის სტუმარმა გენერაციის ობიექტებზე საუბრისას ყურადღება გაამახვილა 20-მეგავატიან ქარის ელექტროსადგურზე. მისი თქმით, ამ ტიპის პროექტების განვითარების ინტერესი გაიზარდა და საქართველოს სახელმწიფო ენერგოსისტემამ მასშტაბური კვლევები დაიწყო. დასაშვები სიმძლავრეები, რასაც ენერგიის ალტერნატიული წყაროები 5-10 წელიწადში გამოიმუშავებენ ეს არის 500-მეგავატი ენერგია ქარის ელექტროსადგურის და 250-მეგავატი მზის ელექტროსადგურის შემთხვევაში (2025 წლისთვის) და დაახლოებით ორჯერ მეტი - 1000 და 520-მეგავატი ქარის და მზის ელექტროსადგურების შემთხვევაში (2030 წლისთვის),“ განაცხადა გიორგი ვახტანგაძემ.
მოამზადა მაკა ბიბილაშვილმა