ჩვენ, უკრაინის ომამდე გაცილებით ადრე მივიღეთ გადაწყვეტილება - არ მოვემსახუროთ რუს ტურისტებს. ეს არ არის მარტივი ფინანსურად, თუმცა არც კონვერტირდება ასე - ამის შესახებ კომპანია „ტრეფიკ თრეველის" მმართველმა პარტნიორმა ცოტნე ჯაფარიძემ რადიო „პალიტრასა“ და „პალიტრანიუსის“ გადაცემაში „საქმე“ განაცხადა.
„რუსეთზე ტურისტული დამოკიდებულებით ჩვენ რეალურად შევდივართ ჩიხში და ვხდებით მასტურიზმის ქვეყანა. ჩვენ, უკრაინის ომამდე გაცილებით ადრე მივიღეთ გადაწყვეტილება - არ მოვემსახუროთ რუს ტურისტებს. ეს არ არის მარტივი ფინანსურად, თუმცა არც კონვერტირდება ასე. თანხობრივად, ამას ვერ დათვლი, ეს არის ფასი, რომელსაც ჩვენ თავისუფლებაში ვიხდით და ვერც ლარებში, ვერც დოლარებში და ვერც რუბლებში ვერ დაითვლება. რა თქმა უნდა, არ ვნანობთ ამ გადაწყვეტილებას და არც არასოდეს შევცვლით. იმდენი პრობლემა მოჰყვებოდა მათთან ურთიერთობას და რუსებთან მუშაობას, რომ გადავწყვიტეთ, სჯობდა გაგვეწყვიტა მათთან კონტაქტები", - განაცხადა ჯაფარიძემ.
მისივე თქმით, სახელმწიფო არასწორად გეგმავს მარკეტინგულ კამპანიებს და შედეგად, სამიზნე ქვეყნებიდან ტურისტული ნაკადების აღდგენა საერთო მაჩვენებელში ნაკლებია.
„საქართველო ტურიზმის მიმართულებით 2019 წლამდე ნორმალურად მიდიოდა. 2018-2019 წლებში გენერირდა ყველაზე მეტი შემოსავალი სექტორში. მერე იყო პანდემია და გასაგებია, როგორც ყველგან, ჩვენთაც დიდი უძრაობის პერიოდი, ახლა კი, სწორ რელსებზე დაბრუნებას ვერ ვახერხებთ. ისევ არ ვახდენთ ჩვენს პოზიციონირებას და სწორი მარკეტინგული კამპანიების წარმოებას სპარსეთის ყურის ქვეყნებში, საიდანაც, ძალიან ბევრი ტურისტი გვყავდა. ისევ ქაოტურია განვითარება. რომ ავიღოთ მაღალგანვითარებული ქვეყნები, რომელიც ჩვენი მიზნობრივი ბაზარი უნდა იყოს, იქედან აღდგენა მხოლოდ 40% იყო და არა 65%, როგორც აპელირებენ", - განაცხადა ცოტნე ჯაფარიძემ „საქმეში".
რუსეთი
