სუპერიახტა Axioma, რომელიც რუს მილიარდერ დმიტრი პუმპიანსკის ეკუთვნოდა, აუქციონზე გაიყიდა გიბრალტარში. ეს პირველი შემთხვევაა, როცა გაიყიდა აქტივები, რომელთა კონფისკაცია მოხდა უკრაინაში შეჭრის საპასუხოდ რუსეთისთვის დაწესებული სანქციების გამო. ამის შესახებ The Guardian-ი იუწყება.
შეთავაზებულ ფასსა და მყიდველის ვინაობას არ იტყობინებიან. აცხადებენ, რომ გარიგების შესახებ ინფორმაცია ორ კვირაში გამოქვეყნდება. აუქციონის ორგანიზატორთა თანახმად, ვაჭრობის განმავლობაში მიიღეს 63 შეთავაზება, მაგრამ დეტალებზე საუბრისგან თავი შეიკავეს.
Axioma-ს, რომელიც პუმპიანკიმ 75 მილიონ დოლარად იყიდა 2013 წელს, 2022 წლის მარტში უყვეს კონფისკაცია - მას შემდეგ, რაც დიდმა ბრიტანეთმა, ევროკავშირმა და აშშ-მა მილიარდერის წინააღმდეგ სანქციები დააწესეს უკრაინაში რუსეთის შეჭრის გამო. დაწესებული შეზღუდვების გამო პუმპიანსკის კომპანიას საშუალება არ მისცეს, ამერიკული ბანკის, JP Morgan-ის ვალი გაესტუმრებინა. ბანკმა სასამართლოში შეიტანა სარჩელი, რომელშიც ამტკიცებდა, რომ პუმპიანსკის კომპანიას მისი 20 მილიონ დოლარზე მეტი მართებს და გიბრალტარის სასამართლოებს სთხოვა, დაეკავებინათ და გაეყიდათ იახტა.
დმიტრი პუმპიანსკი მილების მწარმოებელი მსოფლიოში უდიდესი კომპანია ТМК-ს მფლობელი და ხელმძღვანელი იყო. 2022 წლის მარტში, მის წინააღმდეგ სანქციების დაწესების შემდეგ, პუმპიანსკი გავიდა ТМК-ს ბენეფიციარებიდან და დირექტორთა საბჭოდან. დიდმა ბრიტანეთმა მაშინ განაცხადა, რომ პუმპიანსკი „პუტინის ერთ-ერთი უახლოესი“ ოლიგარქია.