რუსი მილიარდერების საკუთრებაში არსებული, სულ მცირე, ხუთი სუპერიახტა დღეს მალდივების წყლებში გამოჩნდა, რომელიც ინდოეთის ოკეანის კუნძულოვანი ქვეყანაა და შეერთებულ შტატებთან ექსტრადიციის ხელშეკრულება არ აქვს. ინფორმაციას Reuters სახომალდე მოძრაობის სისტემა MarineTraffic-ის მონაცემთა ბაზაზე დაყრდნობით ავრცელებს.

შრი-ლანკის სანაპიროს არქიპელაგთან ოლიგარქების იახტები რუსეთის მიმართ დასავლეთის მკაცრი სანქციების დაწესების შემდეგ გამოჩნდნენ.

სუპერიახტა The Clio, რომელიც ალუმინის გიგანტ Rusal-ის დამფუძნებელ ოლეგ დერიპასკას ეკუთვნის, ქალაქ მეილს დღეს მიადგა. დერიპასკა აშშ-ის სანქციების სიში 2018 წლიდან არის.

სუპერიახტა Titan, რომელსაც ფოლადის მწარმოებელი კომპანია Evraz-ის თანადამფუძნებელი, ალექსანდრე აბრამოვი ფლობს, მალდივებზე 28 თებერვალს გამოჩნდა.

დღესვე მალდივის წყლებში კრუიზის დროს რუსი მილიარდერების კუთვნილი კიდევ სამი იახტა შენიშნეს. მათ შორის არის 88-მეტრიანი Nirvana, რომელიც რუსეთის უმდიდრეს ადამიანს, ვლადიმერ პოტანინს ეკუთვნის.

წლის დასაწყისში ოლიგარქების იახტების უმეტესობა ახლო აღმოსავლეთის პორტებში მოძრაობდნენ. მალდივის მთავრობის სპიკერი ოლიგარქების იახტებზე კომენტარს არ აკეთებს. ახლახან შეერთებულმა შტატებმა განაცხადა, რომ სანქცირებული რუსი პირების ქონების ჩამორთმევისთვის მკაცრ ზომებს მიმართავს.

„უახლოეს კვირებში ჩვენ მრავალმხრივ ტრანსატლანტიკურ სამუშაო ჯგუფს შევქმნით სანქცირებული რუსული კომპანიებისა და ოლიგარქების აქტივების იდენტიფიცირებისთვის, რომ მოვიძოთ და კონფისკაციას დავუქვემდებაროთ მათი იახტები, სასახლეები და უკანონოდ მოპოვებული ნებისმიერი სხვა ქონება. ჩვენ ამას კანონის შესაბამისად გავაკეთებთ,“ - ნათქვამია თეთრი სახლის Twitter-ზე გამოქვეყნებულ განცხადებაში.

bpn.ge