რუსი ოლიგარქის მდიდრული 72-მეტრიანი სუპერიახტა, Axioma 23 აგვისტოს აუქციონზე გაიყიდება. ამის შესახებ წინასწარი გაყიდვის ბუკლეტში წერია, რომელიც Forbes-მა მოიპოვა.
იახტა მილების მწარმოებელი უმსხვილესი რუსული კომპანიის, TMK-ის ყოფილ თანამფლობელ დიმიტრი პუმპიანსკის ეკუთვნოდა, რომელმაც ის 2013 წელს 68 84 მლნ დოლარად შეიძინა.
Axioma მარტის ბოლოს გიბრალტარში დააკავეს. ფორმალურ მიზეზად J.P. Morgan-ის მიმართ 12,5 მლნ დოლარის დავალიანება დასახელდა, რაც პუმპიანსკიმ იახტის შესაძენად გამოიყენა. პუმპიანსკის წინააღმდეგ სანქციების შემოღების შემდეგ ორგანიზაციამ, რომელზეც იახტა იყო დარეგისტრირებული, სესხის მომსახურება შეწყვიტა, რის შემდეგაც გემი ბანკის მოთხოვნით დააკავეს. მოგვიანებით გიბრალტარის სასამართლომ იახტის აუქციონზე გაყიდვის გადაწყვეტილება მიიღო. მინიმალური სავაჭრო ფასი დადგენილი არ არის.
აუქციონი წარმატებული KYC-ის, ანუ საიმედოობაზე კლიენტის შემოწმების საფუძველზე იმავე დღეს დაიხურება, ხოლო გაყიდვიდან მიღებული თანხა გიბრალტარის სასამართლოს გადაერიცხება.
Axioma-ს არა მხოლოდ თავად პუმპიანსკი იყენებდა, არამედ ის აქტიურად ქირავდებოდა კიდეც. ზამთრის სეზონზე იახტის დაქირავების ღირებულება კვირაში 295 000 ევროს შეადგენდა, რაც ზაფხულში 450 000 ევრომდე იზრდებოდა. 2021 წლის შემოდგომაზე გემთმშენებელმა Dunya Yachts-მა 48-მეტრიანი იახტის, My Bro-ს მშენებლობა დაიწყო, რომელიც Axioma-სთვის დამხმარე გემი უნდა ყოფილიყო. მშენებლობის ღირებულება 25-30 მლნ დოლარად იყო შეფასებული.
თავად Axioma-ს 12-მდე სტუმრისა და 20 კაციანი ეკიპაჟის განთავსება შეუძლია. იახტა გარე ჯაკუზით, საცურაო აუზით, მასაჟის ოთახით, ლიფტით, ჰიდროციკლების ავტოფარეხით არის აღჭურვილი. მას, ასევე, ბევრი ლაუნჯ-ზონა როგორც შიდა, ისე გარე ტერიტორიაზე აქვს. იახტაზე განთავსებულია რვაკაციანი 3D კინოთეატრიც, რომელიც ქვედა გემბანზე მდებარეობს.
ფორმალურად 72-მეტრიანი გემი ჰოლდინგურ კომპანია Pyrene Invests-ს ეკუთვნის, რომელიც ბრიტანეთის ვირჯინიის კუნძულებზე არის რეგისტრირებული. თუმცა გემის რეალური ბენეფიციარი დიმიტრი პუმპიანსკია. იახტა მალტის დროშის ქვეშ დაცურავდა.
იახტის ექსტერიერის დიზაინი მონაკოში დაფუძნებულმა სტუდია Sterling Scott Yacht Design-მა შეიმუშავა, ხოლო ინტერიერი ფრანგმა, ალბერტო პინტომ დააპროექტა. გემს ფოლადის კორპუსი, ალუმინის ზედნაშენი და ტიის გემბანი აქვს. CAT-ის ორმაგი ძრავები საშუალებას იძლევა, იახტამ მაქსიმალური სიჩქარე 33 კმ/სთ-ში, ასევე, საკრუიზო სიჩქარე 26 კმ/სთ-ში განავითაროს.
იახტა თურქულ ვერფზე, Dynya-ზე აშენდა და თავდაპირველად Red Square („წითელი მოედანი“) ეწოდებოდა. Axioma ყველაზე დიდი ძრავიანი იახტაა, რაც კი თურქეთში აშენებულა. 2020 წელს მას კაპიტალური რემონტი ჩაუტარდა, რის შემდეგაც მისმა კორპუსმა ნათელი ფირუზისფერი შეიძინა.