ფიჯიში დაკავებული რუსი ბიზნესმენის იახტაზე ფაბერჟეს კვერცხის მსგავსი საგანი აღმოაჩინეს. ამის შესახებ აშშ-ის იუსტიციის მდივნისა და გენერალური პროკურორის პირველმა მოადგილემ, ლიზა მონაკომ ამერიკულ ასპენში უსაფრთხოების ფორუმზე გამოსვლის დროს განაცხადა, რასაც The Guardian ავრცელბს.
ფაბერჟეს ნამდვილი კვერცხის ღირებულება შესაძლოა, მილიონობით დოლარს შეადგენდეს. აშშ თავად იახტას და მის მფლობელს არ ამხელს, თუმცა გამოცემა ვარაუდობს, რომ საუბარია Amadea-ზე, რომლის მფლობელად ვაშინგტონი მილიარდერ სულეიმან ქერიმოვს მიიჩნევს.
„დაკავებულ იახტებზე ჩვენ მართლაც საინტერესო რაღაცეებს ვპოულობთ. ერთ-ერთ მათგანზე ფაბერჟეს ან სავარაუდო ფაბერჟეს კვერცხი ვიპოვეთ. ასე რომ, ეს საქმე სულ უფრო და უფრო საინტერესო ხდება“, - აცხადებს ლიზა მონაკო.
მართალია, მან არ დააკონკრეტა, თუ რომელ იახტაზეა საუბარი, თუმცა აღნიშნა, რომ გემი ახლა სან-დიეგოს ყურეში არის გაჩერებული, სადაც ის ივნისში ფიჯიდან ჩავიდა. 7 ივნისს ფიჯის უზენაესმა სასამართლომ შეერთებულ შტატებს ნება დართო, სუპერიახტა Amadea, რომელიც ვაშინგტონის მოთხოვნით დააკავეს, კუნძულიდან გაეყვანა. გასული თვის ბოლოს იახტა სან დიეგოში გადაიყვანეს.
აშშ-ის ხელისუფლება მიიჩნევს, რომ გემი სანქცირებულ რუს მილიარდერ სულეიმან ქერიმოვს ეკუთვნის. იახტის ოფიციალური მფლობელი კაიმანის კუნძულებზე რეგისტრირებული კომპანია, Millemarin Investments-ია. კომპანიაში აცხადებენ, რომ გემი ქერიმოვს არ ეკუთვნის და ფიჯისგან მოითხოვდნენ, იახტა აშშ-ისთვის არ გადაეცა.
ლიზა მონაკო ამბობს, რომ თუ აღმოჩენილი კვერცხის ავთენტურობა დადასტურდება, მისი ღირებულება შესაძლოა, მილიონობით დოლარი იყოს. იუველირმა, კარლ ფაბერჟემ რუსეთის იმპერიის სამეფო ოჯახისთვის მხოლოდ 50 კვერცხი დაამზადა, რომლიდანაც ყველა არ შემორჩენილა.
„ჩვენს სამართალდამცავ კოლეგებთან ერთად მთელს მსოფლიოში ვმუშაობთ ამ იახტების გამოსავლენად, რომ სასამართლოს გზით ისინი დავაპატიმროთ და შემოსავალი მივიღოთ“, - აცხადებს მონაკო.
ის ამბობს, რომ უკრაინის აღდგენისთვის დაპატიმრებული აქტივებიდან მოგების კონფისკაციის იდეას მხარს უჭერს.
bpn.ge